నేడు భారత్- చైనా మధ్య మరో సారి దౌత్య చర్చలు..!
తూర్పు లద్దాఖ్‌లోని గల్వాన్ లోయ తమదన్న చైనా వాదనను భారత్ మరోసారి ఖండించింది. వాస్తవాధీన రేఖ వెంబడి ఉద్రిక్తతల తగ్గించేందుకు శుక్రవారం దౌత్య చర్చలు జరగనున్న నేపథ్యంలో ఈ విషయాన్ని పునరుద్ఘాటించింది.
సరిహద్దుల్లో శాంతి, సామరస్యం ఆవశ్యకతను భారత్ గుర్తిస్తుందని విదేశాంగ శాఖ అధికార ప్రతినిధి అనురాగ్ శ్రీవాస్తవ స్పష్టం చేశారు. సమస్యలను దౌత్య మార్గంలోనే పరిష్కరించుకునేందుకు సిద్ధమన్నారు. అదే సమయంలో భారత సార్వభౌమాధికారం, ప్రాదేశిక సమగ్రతకు కట్టుబడి ఉంటామని తేల్చిచెప్పారు.
భారత్-చైనా సరిహద్దుల్లోని పశ్చిమ ప్రాంతంలో పరిస్థితులు మెరుగవుతున్నాయని చైనా తెలిపింది. ఈ మేరకు చైనా విదేశాంగ శాఖ అధికార ప్రతినిధి ఝావో లిజియాన్ గురువారం ఒక ప్రకటన చేశారు.