పుష్ప : ఫస్ట్ సింగిల్ ప్రోమో... తగ్గేదే లే !
పాన్ ఇండియా యాక్షన్ థ్రిల్లర్ "పుష్ప: ది రైజ్-పార్ట్ 1" క్రిస్మస్ కానుకగా విడుదల కానున్న విషయం తెలిసిందే. ఈ ప్రకటన అనంతరం సినిమా ప్రమోషన్లను మొదలు పెట్టేశారు మేకర్స్. వెంటనే సినిమా ఫస్ట్ సింగిల్ "దాక్కో దాక్కో మేక"ను రిలీజ్ చేయబోతున్నట్టు ప్రకటించి అందరి దృష్టిని తవైపుకు తిప్పుకున్నాడు "పుష్ప"రాజ్. ఆ సాంగ్ కోసం ప్రేక్షకులు ఆతృతగా ఎదురు చూస్తున్నారు. తాజాగా ఈ సాంగ్ ను ఆగష్టు 13న రిలీజ్ చేయబోతున్నట్టు అధికారికంగా అనౌన్స్ చేస్తూ ఓ ప్రోమోను రిలీజ్ చేశారు.
అందులో అల్లు అర్జున్ తో మ్యూజిక్ డైరెక్టర్ దేవిశ్రీ ప్రసాద్ కూడా దర్శనం ఇచ్చారు. వీరిద్దరూ కలిసి సాంగ్ లోని చిన్న లిరిక్ విన్పించారు. ఈ సాంగ్ ను 5 భారతీయ భాషల్లో విడుదల చేయబోతున్నట్టు ప్రకటించారు. ఈ ప్రోమో నెట్టింట్లో చక్కర్లు కొడుతోంది. అల్లు అర్జున్, రష్మిక, ఫహద్ ఫాసిల్ ప్రధాన పాత్రల్లో ఎర్రచందనం స్మగ్లింగ్ ఆధారంగా క్రియేటివ్ డైరెక్టర్ సుకుమార్ "పుష్ప"ను రెండు భాగాలుగా తెరకెక్కిస్తున్నారు. మొదటి భాగం డిసెంబర్ 25న, రెండవ భాగం 2022లో రిలీజ్ కానుంది.