జగన్ టీమ్‌: మంత్రి పదవి రాలేదని గొడవ చేసేది వీళ్లే?
ఇవాళ జగన్ కొత్తటీమ్ ప్రమాణ స్వీకారం చేయబోతోంది. అయితే మంత్రి వర్గంలో స్థానం దక్కని కొందరు తమ అసంతృప్తిని బాగానే వ్యక్తం చేస్తున్నారు. ప్రధానంగా జగన్ బంధువు బాలినేని శ్రీనివాసరెడ్డి తనకు పదవి రాకపోగా.. తన జిల్లాకే చెందిన ఆదిమూలపు సురేష్‌కు కొనసాగించడంతో తీవ్ర అసంతృప్తికి గురయ్యారు. ఆయన్ను సజ్జల రామకృష్ణా రెడ్డి నిన్న రెండు సార్లు ఇంటికి వెళ్లి బుజ్జగించి వచ్చారు. అయినా ఆయన అలక తీరలేదు. ఇక మాచర్లలో పిన్నెళ్లి రామకృష్ణారెడ్డి వర్గీయులు కూడా ఆందోళన చేశారు. మాజీ హోం మంత్రి సుచరిత అయితే తన ఎమ్మెల్యే పదవికి రాజీనామా చేశారని ఆమె కుమార్తె ప్రకటించారు. మంత్రిపదవి రాకపోవడంతో నెల్లూరు గ్రామీణ ఎమ్మెల్యే కోటంరెడ్డి కన్నీరు పెట్టుకున్నారు. ఇటు జగ్గయ్యపేటలో సామినేని ఉదయభాను మద్దతుదారులు కూడా పెద్దఎత్తున ఆందోళనలు చేశారు. మరికొందరు అసంతృప్తి ఉన్నా సర్దుకుపోయారు.