న్యూ ఇయర్కు ముందే పోలీసుల షాక్! పార్టీలకు కఠిన నిబంధనలు..!
ఇప్పుడే కాదు… ఇంకో కొన్ని రోజుల్లో క్యాలెండర్ మారబోతోంది. నూతన సంవత్సరానికి దేశవ్యాప్తంగా ఏర్పాట్లు అప్పుడే ఊపందుకున్నాయన్న మాట వినిపిస్తోంది. టికెటెడ్ ఈవెంట్స్, స్టార్ నైట్ పార్టీలు, పబ్బులు, రూఫ్టాప్ సెలబ్రేషన్లు అంటూ సోషల్ మీడియా ఇప్పటికే హీట్ పెంచేసింది. ఈ హడావుడిలో హైదరాబాద్ పేరు ప్రత్యేకంగా చెప్పుకోవాల్సిందే. “సిటీ దట్ నెవర్ స్లీప్స్” అన్నట్లుగా… న్యూ ఇయర్ నైట్ వచ్చిందంటే హైదరాబాద్ రోడ్లు, పబ్బులు, ఫామ్ హౌస్లు అన్నీ వెలుగులతో నిండిపోతాయి. అయితే ఈసారి మాత్రం… సంబరాలకు ముందే పోలీసులు స్పష్టమైన హెచ్చరికలు జారీ చేశారు. హైదరాబాద్ ట్రాఫిక్ డీసీపీ రాహుల్ హెగ్డే న్యూ ఇయర్ వేడుకలపై కీలక సూచనలు చేస్తూ… ముందస్తు అనుమతులు లేకుండా ఎలాంటి ఈవెంట్స్ నిర్వహించకూడదని తేల్చిచెప్పారు.
టికెటెడ్ ఈవెంట్ అయితే తప్పనిసరిగా పోలీసుల అనుమతి తీసుకోవాలని, ఈవెంట్కు ఎంతమంది వస్తున్నారు, ఎంతమంది టిక్కెట్లు అమ్ముతున్నారు అనే పూర్తి వివరాలు ముందే సమర్పించాలని స్పష్టం చేశారు. ఇక పార్కింగ్ వ్యవస్థపై కూడా ప్రత్యేక దృష్టి పెట్టాలని చెప్పారు. “ఈవెంట్ జరుగుతోంది” అనే పేరుతో రోడ్లపై గందరగోళం సృష్టిస్తే మాత్రం ఊరుకునేది లేదని హెచ్చరించారు. ఏవైనా ప్రమాదాలు జరిగితే… దానికి పూర్తి బాధ్యత ఈవెంట్ నిర్వాహకులదేనని తేల్చి చెప్పారు. ముఖ్యంగా మద్యం సేవించి వాహనాలు నడిపితే కఠిన చర్యలు తప్పవని స్పష్టం చేశారు. తాగి ఇంటికి వెళ్లేవాళ్లు డ్రైవర్లను ఏర్పాటు చేసుకోవాలన్న సూచన కూడా ఇచ్చారు.
ఈ హెచ్చరికలకు మరింత పదును పెట్టారు హైదరాబాద్ వెస్ట్ జోన్ డీసీపీ సీహెచ్ శ్రీనివాస్. న్యూ ఇయర్ వేడుకలు ఆనందం కోసం మాత్రమే ఉండాలన్నారు. హద్దులు దాటి డ్రగ్స్, అక్రమ కార్యకలాపాల వైపు వెళ్లితే మాత్రం చట్టం తన పని తాను చేస్తుందని హెచ్చరించారు. పార్టీలు, పబ్బుల్లో డ్రగ్స్ వినియోగం లేకుండా నిర్వాహకులు చూసుకోవాలని, ఈ విషయంలో లా అండ్ ఆర్డర్ పోలీసులు మాత్రమే కాదు… ఈగల్ టీమ్ కూడా నిఘా పెట్టనున్నట్లు తెలిపారు. సామర్థ్యానికి మించి టిక్కెట్లు అమ్మకూడదని, సెలబ్రెటీలు వస్తే ముందస్తు సమాచారం ఇవ్వాలని సూచించారు. మైనర్లకు పార్టీల్లో ఎంట్రీ ఉండదని, 31 అర్ధరాత్రి ఆకస్మిక తనిఖీలు ఉంటాయని స్పష్టం చేశారు. మొత్తానికి ఈసారి న్యూ ఇయర్… ఫుల్ ఎంజాయ్ మోడ్లో ఉండాలి గానీ… లా అండ్ ఆర్డర్ను ఛాలెంజ్ చేసేలా మాత్రం ఉండకూడదన్నదే హైదరాబాద్ పోలీసుల క్లియర్ మెసేజ్.