യഥാർത്ഥ 'ജ്വാലാമുഖിയുമായി സുരഭി ലക്ഷ്മി! മലയാളത്തിലെ ക്ലാസ്സിക് ചിത്രമായ 'സുകൃതം'!
യഥാർത്ഥ 'ജ്വാലാമുഖിയുമായി സുരഭി ലക്ഷ്മി! മലയാളത്തിലെ ക്ലാസ്സിക് ചിത്രമായ 'സുകൃതം' സംവിധാനം ചെയ്ത കെ ഹരികുമാർ ആണ് 'ജ്വാലാമുഖി'യും സംവിധാനം ചെയ്തിരിക്കുന്നത്. 'ജ്വാലാമുഖി' എന്ന ചിത്രത്തിലെ പ്രകടനത്തിന് കേരള ഫിലിം ക്രിട്ടിക്‌സ് അവാർഡ് ലഭിച്ചതിന് ശേഷം താൻ അഭിനയിച്ച കഥാപാത്രത്തിന്റെ യഥാർത്ഥ വ്യക്തിത്വമായ സെലീനയോടൊപ്പം, ജ്വലാമുഖിയുടെയും ഒപ്പം പിറന്നാൾ വിശേഷങ്ങളും പങ്കുവെക്കുന്ന വീഡിയോ സുരഭി ലക്ഷ്മി പുറത്തുവിട്ടു. ചിത്രത്തിൽ എയ്ഞ്ചൽ എന്ന പേരാണ് കഥാപാത്രത്തിന് നൽകിയിരിക്കുന്നത്. രണ്ടു കുട്ടികളുടെ അമ്മയായ എയ്ഞ്ചലിന്റെ ജീവിതവും പ്രാരാബ്ധങ്ങളുമാണ് ചിത്രത്തിന്റെ പ്രമേയം. എറണാകുളം തൃക്കാക്കരയിൽ മൃതശരീരങ്ങൾ സംസ്‌കരിക്കുന്ന സെലീന എന്ന സ്ത്രീയുടെ കഥാപാത്രത്തിനെ ആസ്പദമാക്കി ചിത്രീകരിച്ച ചിത്രമാണിത്. സിനിമയുടെ ചിത്രീകരണത്തിന് മുൻപ് തന്റെ കഥാപാത്രത്തെ നേരിൽ കണ്ടു പഠിക്കാൻ കുറച്ച് ആഴ്ചകൾ സുരഭി സെലീനയോടൊപ്പം ചിലവഴിച്ചിരുന്നു.
അതിനിടയിൽ ഇരുവരും നല്ലപോലെ അടുക്കുകയും സൗഹൃദം പങ്കിടുകയും ചെയ്തു. മൃതദേഹങ്ങൾ സംസ്‌കരിക്കുന്ന ഒരു സ്ത്രീ സമൂഹത്തിലും വ്യക്തിജീവിതത്തിലും ഉള്ള മനോഭാവം എല്ലാം സുരഭിക്ക് അന്യമായിരുന്നു. സെലീനയുടെ നിത്യജീവിതം പഠിക്കുന്നതിന് കൂടെ അവരുടെയൊപ്പം ജോലി ചെയ്ത് പഠിക്കുകയും ചെയ്തു. സെലീനയുടെ വീടുവിട്ട് വരുന്നതിന് മുൻപ് സെലീന ഉപയോഗിക്കുന്ന ചെരുപ്പ് മേടിച്ചിട്ട് പുതിയ ഒരെണ്ണം സുരഭി മേടിച്ചു കൊടുക്കുകയുണ്ടായിരുന്നു. അതുപോലെ തന്നെ സെലീന വേളാങ്കണ്ണിയിൽ പോയപ്പോൾ മേടിച്ച തന്റെ കൊന്തയും ഷർട്ടും ഒക്കെ സുരഭിക്ക് സമ്മാനിച്ചു. ഇതൊക്കെ തന്നെയാണ് സിനിമ ചിത്രീകരിച്ചപ്പോഴും സുരഭി അണിഞ്ഞത്. അഭിനയിക്കുമ്പോഴും തന്റെ കൂടെ സെലീന ചേച്ചി ഉണ്ടാവും എന്ന വിശ്വാസം ആണ് അങ്ങനെ ചെയ്യാൻ തന്നെ പ്രേരിപ്പിച്ചതെന്ന് സുരഭി സൂചിപ്പിച്ചു.
വളരെ പ്രചോദനവും ഉൾകാഴ്ചകളും നൽകിയ വ്യക്തിയാണ് സെലീന ചേച്ചി എന്ന് സുരഭി പങ്കുവച്ചു. വളരെ രസകരമായ വിശേഷങ്ങളാണ് വിഡിയോയിൽ കാണിച്ചിരിക്കുന്നത്. സുരഭിയും സെലീനയും തമ്മിൽ പങ്കുവച്ച അനുഭവങ്ങളും സെലീനയെ കുറിച്ചുള്ള തന്റെ അഭിപ്രായങ്ങളുമെല്ലാം കൗതുകകരമാണ്. ചിത്രത്തിന്റെ പിന്നാമ്പുറ കാഴ്ചകളും ഇതിനോടൊപ്പം ഉൾപ്പെടുത്തിയിട്ടുണ്ട്. 2016ൽ 'മിന്നാമിനുങ്ങ്' എന്ന ചിത്രത്തിന് ദേശീയ പുരസ്‌കാരം നേടിയതിനു ശേഷം അഭിനയിച്ച ചിത്രമാണ് 'ജ്വാലാമുഖി'.
ദേശീയ അവാർഡിന് പിന്നാലെ തന്നെ കേരള ഫിലിം ക്രിട്ടിക്‌സ് അവാർഡ് കൂടി നേടിയത് സുരഭിക്ക് അഭിമാനിക്കാവുന്ന നേട്ടം തന്നെയാണ്. സൗബിൻ, ദിലീഷ് പോത്തൻ എന്നിവരോടൊപ്പം കേന്ദ്ര കഥാപാത്രമായി എത്തുന്ന കള്ളൻ ഡിസൂസ, ദുൽഖർ ചിത്രം കുറുപ്പ്, അനുരാധ, തല, പൊരിവെയിൽ എന്നീ ചിത്രങ്ങളും ഷൂട്ടിംഗ് പൂർത്തിയായി ഉടൻ റിലീസിനെത്തുന്ന ചിത്രങ്ങൾ ആണ്. ഒരിടവേളയ്ക്ക് ശേഷം അനൂപ് മേനോൻ സംവിധാനം ചെയ്യുന്ന പദ്മ ആണ് നടി സുരഭി ലക്ഷ്മിയുടെ റിലീസിന് തയ്യാറെടുക്കുന്ന ഏറ്റവും പുതിയ ചിത്രം.