ഞെട്ടലോടെ "പകലും പാതിരാവും"
ഞെട്ടലോടെ "പകലും പാതിരാവും". അജയ് വാസുദേവ് സംവിധാനം ചെയ്ത പുതിയ ചിത്രം പകലും പാതിരാവും അതേ ട്രാക്കിൽ പ്രേക്ഷകരെ അസ്വസ്ഥരാക്കിയാണ് കഥ അവസാനിക്കുന്നത്. രാജാധിരാജ, മാസ്റ്റർ പീസ്, ഷൈലോക് എന്നീ ആക്ഷൻ മാസ് സിനിമകൾ ഒരുക്കിയ അജയ് വാസുദേസ് ട്രാക്ക് മാറ്റിയുള്ള സഞ്ചാരിക്കുകയാണ് പുതിയ ചിത്രത്തിലൂടെ. കുഞ്ചാക്കോ ബോബൻ, രജീഷ വിജയൻ, കെ.യു. മനോജ്, സീത, ഗുരു സോമസുന്ദരം, ജയ് ഭീം ഫെയി തമിഴ് എന്നിവരാണ് പ്രധാന കഥാപാത്രങ്ങളായിരിക്കുന്നത്. പതിഞ്ഞ താളത്തിലാണ് സഞ്ചരിക്കുന്നതെങ്കിലും പ്രേക്ഷകരെ വൈകാരികകമായി ക്ലൈമാക്സിൽ അസ്വസ്ഥമാക്കുന്ന സിനിമാ കാഴ്ചകൾ മുമ്പ് പ്രേക്ഷകർ കണ്ടിട്ടുള്ളതാണ്. ഒരോ പകലിനു പിന്നാലെ ഇരുട്ടിൻ്റെ കരിമ്പടവും പുതച്ച് പാതിരാവ് കടന്നുവരും. ഉള്ളിൽ അടക്കിപ്പിടിച്ച അത്യാഗ്രഹവും തീരാത്ത ദുരയും ഇരുട്ട് ഘനംവെയ്ക്കുന്ന പോലെ മനുഷ്യനിലും ഉയർന്നു വരും.
അതിൻ്റെ ഫലമോ ഒട്ടും മറക്കാനാവാത്ത വലിയ വിപത്തിലേക്ക് താനെ സഞ്ചരിക്കേണ്ടിവരുന്ന മനുഷ്യ ജീവിതവും. പകലും പാതിരാവും എന്ന സിനിമ വെള്ളിത്തിരയിൽ അത്തരം ഒരു പകലിൻ്റെയും പാതിരാവിൻ്റെയും കാഴ്ചയിലേക്ക് പ്രേക്ഷകരെ കൊണ്ടു പോകുന്നു. ഒരിക്കലും വീണ്ടും ആവർത്തിക്കരുതെന്നു പ്രേക്ഷകർ പോലും ആഗ്രഹിക്കുന്ന പാതിരാ കാഴ്ചയായിരുന്നു അത്. നിഷാദ് കോയ തിരക്കഥ ഒരുക്കിയ ചിത്രത്തിൻ്റെ കഥാ പശ്ചാത്തലം വയനാടിൻ്റെ മണ്ണിലാണ്. മാവോയിസ്റ്റ് പശ്ചാത്തലമൊക്കെ ആ ഭൂമികയിലേക്ക് ഇടം പിടിക്കുന്നതോടെ കഥ കൂടുതൽ സങ്കീർണമാകുന്നു. ചിത്രത്തിൽ നിഗൂഡതയേറിയ കഥാപാത്രമായി കുഞ്ചാക്കോ ബോബൻ്റെ കഥാപാത്രമാണ് എത്തുന്നത്. എങ്കിലും സ്ക്രീൻ പ്രെസൻസ് രജീഷയ്ക്കാണ്.
കാരണം പകലും പാതിരാവും രജീഷ അവതരിപ്പിക്കുന്ന മേഴ്സിയുടെ കുടുംബത്തിൻ്റെ കഥയാണ് പറയുന്നത്. രജീഷ വിജയന് വലിയ സാധ്യത ചിത്രം നൽകിയെങ്കിലും ആവർത്തനങ്ങൾക്ക് അപ്പുറം പുതുമ സൃഷ്ടിക്കാനോ പ്രേക്ഷകരെ സ്വാധീനിക്കാനോ കഴിഞ്ഞിട്ടുണ്ടോ എന്നത് സംശയമാണ്. ഇത്തരം ഒരു കഥാപാത്രത്തെ രജീഷ ആദ്യമായി അവതരിപ്പിച്ച് മലയാളി പ്രേക്ഷകർ കാണുകയായിരുന്നെങ്കിലും മുമ്പ് കണ്ട മാനറിസങ്ങളിൽ തന്നെയാണ് ഈ നായിക കറങ്ങിത്തിരിയുന്നത്. ഒറ്റപ്പെട്ട സ്ഥലത്ത് താമസിക്കുന്ന ദരിദ്ര കുടുംബത്തിലേക്ക് അഭയം ചോദിച്ചെത്തുകയാണ് അജ്ഞാതനായ യുവാവ്. ആ വീട്ടിൽ ഒരു ദിവസം തങ്ങാൻ അയാളെ അനുവദിച്ചതോടെ അവരുടെ ജീവിതവും മാറിമറിയുകയായിരുന്നു. കടന്നു പോകുന്ന സാഹചര്യങ്ങളുടെ വൈകാരികതയെ പ്രേക്ഷകരിലേക്ക് കൃത്യമായി എത്തിക്കുന്നതിൽ സീതയുടെ ഭാവപ്രകടനങ്ങൾ ഏറെ പ്രശംസനീയമാണ്. മലയാളത്തിൽ ഇനി തിരക്കേറുന്ന സ്വഭാവ നടൻ താനാണെന്ന് കെ.യു. മനോജ് തെളിയിച്ചിരിക്കുന്നു.
അത്ര അനായാസം തൻ്റെ കഥാപാത്രത്തെ പകർന്നാടാൻ ഈ കലാകാരന് കഴിഞ്ഞിട്ടുണ്ട്. ഗുരു സോമസുന്ദരം പോലീസ് കഥാപാത്രത്തെ അനായാസമാക്കിയെങ്കിലും തമിഴ് മലയാളം ശൈലിയിലെ സംഭാഷണം പലപ്പോഴും കല്ലുകടിയാകുന്നുണ്ട്. ചിത്രത്തിൻ്റെ നിർമാതാവ് ഗോകുലം ഗോപാലനും പുരോഹിത വേഷവുമായി കഥയുടെ ഭാഗമാകുന്നുണ്ട്.പാത്രാവിഷ്കാരത്തിൽ സീതയും കെ.യു. മനോജും പ്രേക്ഷ ഇഷ്ടം നേടിയെടുക്കുന്നുണ്ട്. ദയാൽ പത്മനാഭൻ സംവിധാനം ചെയ്തു 2018 ൽ പുറത്തിറങ്ങിയ ആ കരാള രാത്രി എന്ന സിനിമയുടെ ഔദ്യോഗിക റീമേക്കാണ് പകലും പാതിരാവും. റഷ്യൻ നാടോടിക്കഥയായ ദി റിട്ടേൺ ഓഫ് ദി സോൾജിയറിനെ ആസ്പദമാക്കി കന്നഡ നാടകകൃത്തായ മോഹൻ ഹബ്ബു രചിച്ച നാടകത്തിൻറെ ചലച്ചിത്രാവിഷ്ക്കാരമായിരുന്നു ആ കരാള രാത്രി. 90 കളിലെ കർണാടകയിലെ പേരില്ലാത്ത കുഗ്രാമത്തിലാണ് കഥയെ അവതരിപ്പിച്ചത്.