ആദിത്ത കരികാലന്റെ ലുക്ക് പിറന്നത് എങ്ങനെ?
ആദിത്ത കരികാലന്റെ ലുക്ക് പിറന്നത് എങ്ങനെ? അടുത്ത മാസം 18 ന് ചിത്രം തീയേറ്ററുകളിലെത്തുകയാണ്. കഴിഞ്ഞ വർഷം സെപ്റ്റംബറിൽ പുറത്തിറങ്ങിയ ആദ്യ ഭാഗം തമിഴ് സിനിമ ചരിത്രത്തിലെ എക്കാലത്തെയും ഏറ്റവും കൂടുതൽ കളക്ഷൻ നേടിയ ചിത്രങ്ങളിലൊന്നായി മാറി. കൽക്കി കൃഷ്ണമൂർത്തിയുടെ അതേ പേരിലുള്ള പ്രശസ്തമായ നോവലിനെ ആസ്പദമാക്കിയാണ് പൊന്നിയിൻ സെൽവൻ ഒരുക്കിയിരിക്കുന്നത്. ചിത്രത്തിലെ പ്രേക്ഷകർ ഒന്നടങ്കം ഹൃദയത്തിലേറ്റിയ കഥാപാത്രങ്ങളിലൊന്നായിരുന്നു ആദിത്ത കരികാല(Aditha Karikalan)ന്റേത്. വിക്ര(vikram)മായിരുന്നു ആദിത്ത കരികാലനായി സ്ക്രീനിൽ തിളങ്ങിയത്. ആദിത്ത കരികാലനിലൂടെയാണ് പൊന്നിയിൻ സെൽവൻ ആദ്യ ഭാഗം കഥയിലേക്ക് പ്രവേശിക്കുന്നതും. യുദ്ധങ്ങളിൽ അതീവ തൽപ്പരനും ആരെയും പേടിയില്ലാത്തവനുമായ ആദിത്ത കരികാലന്റെ കഥാപാത്രം എല്ലാം പിടിച്ചെടുക്കുന്നവന്റെ കൂടിയാണ്.
ഏറെ ആകാംക്ഷയോടെ തെന്നിന്ത്യൻ സിനിമ പ്രേക്ഷകർ കാത്തിരിക്കുന്ന ചിത്രങ്ങളിലൊന്നാണ് മണിരത്ന(Mani Ratnam)ത്തിന്റെ പൊന്നിയിൻ സെൽവൻ 2 (ponniyin selvan 2). പൊന്നിയിൻ സെൽവനിൽ യുദ്ധത്തോട് അടങ്ങാത്ത ത്വര പ്രകടിപ്പിക്കുന്ന കഥാപാത്രങ്ങളിലൊന്നാണ് ആദിത്ത കരികാലന്റേത്. എന്നാൽ പുറമേ വീരശൂര പരാക്രമിയാണെങ്കിലും ഉള്ള് നിറയെ വേദന കൊണ്ടു നടക്കുന്നയാൾ കൂടിയാണ് കരികാലൻ. മുറിവേറ്റവനെ വളരെ തന്മയത്വത്തോടെ തന്നെ സിനിമയിൽ വിക്രം അവതരിപ്പിച്ചിട്ടുമുണ്ട്. മനസിനേറ്റ മുറിവിൽ നിന്ന് രക്ഷപ്പെടാനാകാതെ നിസഹായനായി പോകുന്ന ഒരു മനുഷ്യനേയും ആദിത്ത കരികാലനിൽ കാണാനാകും. ഒരുപക്ഷേ ആ മുറിവുകളിൽ നിന്നും വേദനകളിൽ നിന്നുമുള്ള അദ്ദേഹത്തിന്റെ രക്ഷപ്പെടലിനുള്ള മാർഗം കൂടിയായിരിക്കാം പോർക്കളങ്ങൾ. അതേസമയം നന്ദിനിയ്ക്ക് ഒരു സാമ്രാജ്യത്തത്തോട് തന്നെയുള്ള പകയും പ്രതികാരവും തുടങ്ങുന്നതും ഇവിടെ നിന്നു തന്നെയാണ്.
ആദിത്തന് നന്ദിനിയോട് ഉണ്ടായിരുന്ന പ്രണയം എത്ര തീവ്രവും ആഴമേറിയതുമായിരുന്നുവെന്ന് പൊന്നിയിൻ സെൽവനിലെ ആദ്യ ഭാഗത്തെ അദ്ദേഹത്തിന്റെ ചില സംഭാഷണങ്ങളിൽ നിന്നു മനസിലാകും. നന്ദിനിയെക്കുറിച്ച് കരികാലൻ ഓർക്കുന്നതു പോലും അതിമനോഹരമായാണ്. പ്രണയവും വിരഹവും ഒരേസമയം ആദിത്ത കരികാലനിൽ മിന്നിമായുന്നതും പൊന്നിയിൻ സെൽവനിൽ കാണാം. ഐശ്വര്യ റായ് (Aishwarya Rai Bachchan) അവതരിപ്പിക്കുന്ന നന്ദിനി (nandini) എന്ന കഥാപാത്രത്തോടുള്ള അതിരില്ലാത്ത പ്രണയം സാക്ഷാത്കരിക്കാതെ പോയിടത്തു നിന്നാണ് ആദിത്ത കരികാലന്റെ അസുന്തഷ്ടതകളും കോപവും വേദനയുമെല്ലാം തുടങ്ങുന്നത്.
കഴിഞ്ഞ ദിവസം ആദിത്ത കരികാലന്റെ പടച്ചട്ട ഒരുക്കുന്നതിന്റെ വീ‍ഡിയോ നിർമ്മാതാക്കളായ ലൈക്ക പ്രൊഡക്ഷൻസ് പുറത്തുവിട്ടിരുന്നു. കരികാലന്റെ ലുക്ക് ഘട്ടം ഘട്ടമായി ഒരുക്കുന്നത് വീഡിയോയിൽ കാണാം. പടച്ചട്ട മുതൽ വസ്ത്രങ്ങളിൽ കൊത്തിവച്ചിരിക്കുന്ന ആഭരണങ്ങളും ചിഹ്നങ്ങളും ഹെയർസ്റ്റൈലും വരെ വളരെ കൃത്യമായി സൂക്ഷ്മതയോടെയാണ് ഒരുക്കിയിരിക്കുന്നത്.ചിത്രത്തിന്റെ ട്രെയ്‌ലർ ഉടനെ തന്നെ പുറത്തുവരുമെന്ന് അണിയറപ്രവർത്തകർ അറിയിച്ചിരുന്നു. ട്രെയ്‌ലർ റിലീസ് തീയതി ടീം വെളിപ്പെടുത്തിയിട്ടില്ലെങ്കിലും ഏറ്റവും പുതിയ അപ്‌ഡേറ്റുകൾ സൂചിപ്പിക്കുന്നത്, ഏപ്രിൽ ആദ്യ വാരത്തോടെ ചെന്നൈയിൽ നടക്കുന്ന ഗ്രാൻഡ് ഫങ്ഷനിൽ വച്ച് ട്രെയ്‌ലർ ലോഞ്ച് നടക്കുമെന്നാണ്. കഴിഞ്ഞ ദിവസം ചിത്രത്തിലെ ആദ്യ ഗാനവും അണിയറപ്രവർത്തകർ പുറത്തുവിട്ടിരുന്നു.