ఆసక్తి రేపుతున్న 'మిషన్ రాణిగంజ్' టీజర్!
బాలీవుడ్ అగ్ర హీరో అక్షయ్ కుమార్ క్రేజ్ గురించి ప్రత్యేకంగా చెప్పనక్కర్లేదు. హిట్, ప్లాప్స్ తో సంబంధం లేకుండా ప్రస్తుతం బాలీవుడ్ లో వరుస సినిమాలు చేస్తున్నాడు ఈ బాలీవుడ్ హీరో. రీసన్ గానే 'ఓ మై గాడ్ 2' సినిమాలో శివుడి పాత్ర పోషించి ఆకట్టుకున్నారు. ఈ సినిమా బాక్సాఫీస్ వద్ద మంచి విజయం సాధించింది. ఇక ఇప్పుడు మరో విభిన్న తరహా సినిమాతో ప్రేక్షకుల ముందుకు రావడానికి సిద్ధమయ్యారు ఈ బాలీవుడ్ హీరో. రాణిగంజ్ కోల్డ్ ఫీల్డ్ లో 65 మంది మైనర్ లను కాపాడిన జస్వంత్ సింగ్ గిల్ జీవితం ఆధారంగా రూపొందుతున్న తాజా చిత్రం 'మిషన్ రాణిగంజ్' 'ది గ్రేట్ భారత్ రెస్క్యూ' అనేది ఈ చిత్రానికి ట్యాగ్ లైన్.
బాలీవుడ్ స్టార్ అక్షయ్ కుమార్ టైటిల్ రోల్ చేస్తున్నారు. టీను సురేష్ దేశాయ్ ఈ మూవీని తెరకెక్కిస్తున్నారు. ఈ సినిమాలో అక్షయ్ సరసన పరిణితి చోప్రా హీరోయిన్గా నటిస్తుండగా.. రవి కిషన్, కుముద్ మిశ్రా, పవన్ మల్హోత్రా, రాజేష్ శర్మ, వీరేంద్ర సక్సేనా, శిశిర్ శర్మ, అనంత్ మహాదేవన్, జమీల్ ఖాన్, ముఖేష్ భట్ కీలకపాత్రలు పోషిస్తున్నారు. తాజాగా ఈ సినిమా టీజర్ ను అక్షయ్ కుమార్ సోషల్ మీడియాలో అభిమానులతో పంచుకున్నారు.' 1989లో ఒక అసాధ్యమైన దానిని సాధించిన భారతదేశ నిజమైన హీరో కథను ప్రపంచానికి పరిచయం చేస్తున్నాను' అంటూ టీజర్ ని షేర్ చేశారు. ఇక టీజర్ ఆద్యంతం ఆకట్టుకునే విధంగా ఉంది.
ముఖ్యంగా టీజర్ లో రెస్క్యూ ఆపరేషన్ లో 350 అడుగుల లోతులో చిక్కుకుపోయిన మైనర్ల ప్రాణాలను కాపాడడానికి ఒక రక్షకుడిగా అక్షయ్ కుమార్ చేస్తున్న ప్రయత్నాలను ఎంతో ఉత్కంఠ భరితంగా టీజర్ లో చూపించారు. ఇక టీజర్ లో జస్వంత్ సింగ్ గిల్ గా అక్షయ్ కుమార్ పంజాబీ వేషాధరణలో కనిపించి ఆకట్టుకున్నారు. ప్రస్తుతం సోషల్ మీడియాలో ఈ టీజర్ నెటిజన్స్ ని ఆకట్టుకుంటుంది. పూజ ఎంటర్టైన్మెంట్స్ బ్యానర్ పై జాకీ భగ్నాని, దీప్సిక దేశ్ ముఖ్, అజయ్ కపూర్, వాసు బగ్నాని ఈ సినిమాని నిర్మిస్తున్నారు. అక్టోబర్ 5 న ప్రపంచవ్యాప్తంగా ఈ సినిమా విడుదల కానుంది.