ఆ స్టార్ హీరోయిన్ తో అడివి శేష్ రొమాన్స్!
అడవి శేష్ హీరోగా 2018 లో వచ్చిన 'గూడచారి' మూవీ ఎంత పెద్ద హిట్ అయిందో తెలిసిందే. శశికిరణ్ తిక్క దర్శకత్వం వహించిన ఈ చిత్రంలో అడవి శేష్ కి జోడిగా శోభిత ధూళిపాళ్ల హీరోయిన్ గా నటించింది. ప్రకాష్ రాజ్, జగపతిబాబు, మధుశాలిని, వెన్నెల కిషోర్ కీలక పాత్రలు పోషించారు. స్పై అండ్ యాక్షన్ థ్రిల్లర్ గా వచ్చిన ఈ మూవీ ప్రేక్షకులను విపరీతంగా ఆకట్టుకుంది. ముఖ్యంగా సినిమాలో అడివి శేష్ నటన, కథలోని ట్విస్టులు ఆడియన్స్ ని ఎంతో థ్రిల్ చేశాయి.. అంతేకాదు 2018 సంవత్సరంలో బ్లాక్ బస్టర్ హిట్ అందుకున్న సినిమాల్లో ఒకటిగా నిలిచింది.
ఇప్పుడు ఈ సినిమాకి సీక్వెల్ గా 'గూడచారి 2'మూవీ తెరకెక్కుతున్న సంగతి తెలిసిందే. ఈ సినిమాతో వినయ్ కుమార్ దర్శకుడుగా వెండితెరకు ఆరంగేట్రం చేస్తున్నాడు. స్పై అండ్ యాక్షన్ థ్రిల్లర్ గా రాబోతున్న ఈ చిత్రాన్ని పాన్ ఇండియా లెవెల్ లో ప్రతిష్టాత్మకంగా రూపొందిస్తున్నారు. పీపుల్స్ మీడియా ఫ్యాక్టరీ, అభిషేక్ అగర్వాల్ ఆర్ట్స్ బ్యానర్లపై టీజీ విశ్వ ప్రసాద్, అభిషేక్ అగర్వాల్ సంయుక్తంగా ఈ చిత్రాన్ని నిర్మిస్తున్నారు. ఇప్పటికే రిలీజ్ అయిన మోషన్ టీజర్, పోస్టర్స్ కి మంచి రెస్పాన్స్ వచ్చింది. ఇదిలా ఉంటే తాజాగా ఈ మూవీ నుంచి అదిరిపోయే అప్డేట్ అందించారు మేకర్స్.
'గూడచారి 2' లో హీరోయిన్ గా బనితా సంధు నటిస్తున్నట్లు మేకర్స్ ప్రకటించారు. ఇదే విషయాన్ని తెలియజేస్తూ ఓ పోస్టర్ రిలీజ్ చేశారు. 'వెల్కమ్ టు ద మిషన్ బనితా సంధు' అంటూ రిలీజ్ చేసిన ఈ పోస్టర్ నెట్టింట వైరల్ గా మారింది. ఇక హీరోయిన్ బనిత సందు విషయానికొస్తే.. బాలీవుడ్లో 'అక్టోబర్'మూవీతో హీరోయిన్ గా ఎంట్రీ ఇచ్చింది. ఆ తర్వాత 'అర్జున్ రెడ్డి' తమిళ రీమేక్ ఆదిత్య వర్మ లో చియాన్ విక్రమ్ కొడుకుతో కలిసి నటించింది. బాలీవుడ్, సౌత్ సినిమాలతో పాటుగా హాలీవుడ్ లో 'ఎటర్నల్ బ్యూటీ', 'మదర్ తెరిసా అండ్ మీ' అనే సినిమాలతో మంచి గుర్తింపు తెచ్చుకుంది.