రిలీజై నెలలు.. సంవత్సరాలు గడుస్తున్నా ఓటీటీ లోకి రాని సినిమాలు ఇవే..?
టాలీవుడ్ యువ నటుడు అక్కినేని అఖిల్ కొంత కాలం క్రితం ఏజెంట్ అనే మూవీ లో హీరోగా నటించిన విషయం మన అందరికీ తెలిసిందే. సాక్షి వైద్య హీరోయిన్ గా నటించిన ఈ మూవీ కి సురేందర్ రెడ్డి దర్శకత్వం వహించాడు. ధియేటర్లలో భారీ ఎత్తున విడుదల అయిన ఈ సినిమా బాక్స్ ఆఫీస్ దగ్గర బోల్తా కొట్టింది. ఈ సినిమా యొక్క ఓ టి టి హక్కులను సోనీ లివ్ సంస్థ దక్కించుకున్నట్లు వార్తలు వచ్చాయి. అలాగే ఈ సంస్థ కొంత కాలం క్రితం ఈ మూవీ ని తమ ఓ టీ టీ లో స్ట్రీమింగ్ చేయనున్నట్లు అధికారిక ప్రకటన కూడా విడుదల చేసింది. కానీ లాస్ట్ మినిట్ లో ఈ మూవీ స్ట్రీమింగ్ ఆగిపోయింది. అప్పటి నుండి ఇప్పటి వరకు ఈ సినిమా స్ట్రీమింగ్ కాలేదు. అలాగే అందుకు సంబంధించిన అప్డేట్ రావడం లేదు. తమిళ నటుడు శివ కార్తికేయన్ ఈ సంవత్సరం ప్రారంభంలో ఆయలాన్ అనే సినిమాతో ప్రేక్షకుల ముందుకు వచ్చాడు. ఈ మూవీ తెలుగులో థియేటర్లలో విడుదల అయ్యి పర్వాలేదు అనే స్థాయి విజయాన్ని అందుకుంది. ఇక ఇప్పటికే ఈ సినిమా విడుదల అయ్యి దాదాపు ఆరు నెలలు గడుస్తున్నా ఇప్పటి వరకు ఈ సినిమా ఏ ఓ టీ టీ లోకి రాలేదు.