അധികം വൈകാതെ അടുത്ത റിസപ്‌ഷൻ, വിവാഹത്തിന് ശേഷം പറഞ്ഞപോലെ മീര നന്ദൻ ദുബായിലേക്ക്!
അധികം വൈകാതെ അടുത്ത റിസപ്‌ഷൻ, വിവാഹത്തിന് ശേഷം പറഞ്ഞപോലെ മീര നന്ദൻ ദുബായിലേക്ക്! നസ്രിയയും ഫഹദും മുതൽ മലയാള സിനിമയിലെ മുൻനിര താരങ്ങൾ എല്ലാം മീരയുടെ വിവാഹം കൂടാൻ എത്തിയിരുന്നു. ജൂൺ 29 നായിരുന്നു മീരയുടെ മാംഗല്യം. മീരയുടെ ആഗ്രഹം പോലെ ഗുരുവായൂർ ക്ഷേത്രത്തിൽ വെച്ചായിരുന്നു വിവാഹം. ലണ്ടനിൽ അക്കൗണ്ടന്റ് ആയ ശ്രീജുവാണ് മീരയുടെ ജീവിതനായകൻ.മലയാള സിനിമാലോകം ഏറെ ആഘോഷിച്ച താരവിവാഹങ്ങൾ ആയിരുന്നു ഭാഗ്യ സുരേഷ് ഗോപി, മാളവിക ജയറാം പിന്നാലെ എത്തിയ മീര നന്ദൻ വിവാഹം. ഏറ്റവും ഒടുവിലാണ് മീരയുടെ വിവാഹം നടന്നത്. മാട്രിമോണി സൈറ്റ് വഴിയാണ് മീരയും ശ്രീജുവും പരിചയപ്പെട്ടത്. ശേഷം ഇരുവരുടേയും മാതാപിതാക്കൾ ആലോചിച്ചുറപ്പിച്ച വിവാഹം ആയിരുന്നു മീരക്ക്.
വിവാഹശേഷവും താൻ ജോലിയുമായി ദുബായിൽ ഉണ്ടാകും എന്നാണ് മീര മാധ്യമങ്ങളോടായി പറഞ്ഞത്. ഹണിമൂണും ലണ്ടനിലെ റിസപ്‌ഷനും കുറച്ചു നാൾ കഴിഞ്ഞാകും എന്നും മീര അറിയിച്ചിരുന്നു. കഴിഞ്ഞവർഷം സെപ്റ്റംബർ 13-നായിരുന്നു താരത്തിന്റെ വിവാഹനിശ്ചയം.മീര പറഞ്ഞപോലെ തിരികെ ജോലിയിലേക്ക് കടന്നു. ശ്രീജു ലണ്ടനിലേക്ക് പോയെന്നും, അടുത്ത റിസെപ്ഷൻ അധികം വൈകാതെ തന്നെ ഉണ്ടാകുമെന്നുമാണ് സൂചന. കഴിഞ്ഞദിവസം മീര പങ്കുവച്ച സ്റാറ്റസ്റ്റിലൂടെ ആണ് ജോലിയിൽ തിരികെ എത്തിയതായുള്ള സന്തോഷം പറഞ്ഞത്. തിരിച്ചെത്തിയ മീരയ്ക്ക് സുഹൃത്തുക്കൾ സ്വീകരണം ഒരുക്കിയതിന്റെ വിശേഷവും സോഷ്യൽ മീഡിയയിൽ നിറയുന്നുണ്ട്. മെഹന്ദി, ഹൽദി, സംഗീത് ആഘോഷങ്ങളും വിവാഹത്തിന്റെ ഭാഗമായുണ്ടായിരുന്നു.
അഞ്ചുദിവസത്തോളം നീണ്ടുനിന്ന വിവാഹച്ചടങ്ങിൽ നസ്രിയ നസീം, ശ്രിന്ദ, ആൻ അഗസ്റ്റിൻ, സെലിബ്രിറ്റി മേക്കപ്പ് ആർട്ടിസ്റ്റുമായ ഉണ്ണി പി.എസ് , സജിത്ത് ആന്റ് സുജിത്ത്, കാവ്യ, ദിലീപ് എന്നുവേണ്ട സിനിമയിലെ ഒട്ടുമിക്ക താരങ്ങളും പങ്കെടുത്തിരുന്നു. കൊച്ചി എളമക്കര സ്വദേശിനിയായ മീര നന്ദനെ മുല്ല എന്ന ചിത്രത്തിലൂടെ സംവിധായകൻ ലാൽജോസാണ് മലയാളസിനിമയ്ക്ക് പരിചയപ്പെടുത്തിയത്. 2008 ലാണ് മുല്ല റിലീസായത്. ടെലിവിഷൻ ആങ്കറായി കരിയർ ആരംഭിച്ച മീര ദിലീപിന്റെ നായികയായിട്ടാണ് ബിഗ് സ്‌ക്രീനിലേക്ക് എത്തിയത്. അതിന് ശേഷം നിരവധി സിനിമകളുടെ ഭാഗമായി. തമിഴ് സിനിമകളിലും നടി വിജയം നേടിയിരുന്നു.
പിന്നീട് അഭിനയത്തിൽ നിന്ന് ബ്രേക്ക് എടുത്ത് റേഡിയോയിലേക്ക് പോകുകയായിരുന്നു. ദുബായിൽ ആണ് മീര റേഡിയോ ജോക്കിയായി വർക്ക് ചെയ്യുന്നത്. മീരയെ ആദ്യമായി കണ്ട നിമിഷത്തെ കുറിച്ച് അടുത്തിടെ മീര പങ്കിട്ട വീഡിയോയിൽ ശ്രീജു സംസാരിച്ചിരുന്നു. മീരയെ കണ്ട നിമിഷത്തിൽ തന്നെ ഇഷ്ടം തോന്നിയെന്നും തന്റെ ഭാര്യയാകാൻ പോകുന്ന പെൺകുട്ടിയാണെന്ന് അപ്പോൾതന്നെ തോന്നിയിരുന്നുവെന്നുമാണ് ശ്രീജു പറഞ്ഞത്. സുന്ദരിയായ ഒരു പെൺകുട്ടിയെ വിവാഹം ചെയ്തതിൽ ഒരുപാട് സന്തോഷമുണ്ടെന്നും ഇനി എന്നും മീര സന്തോഷവതിയായിരിക്കുമെന്നും മീരയുടെ സ്വന്തം ശ്രീജു പറഞ്ഞിരുന്നു.