కృష్ణవంశీ నైరాశ్యం !
తరుచూ చాట్ చేస్తూ ఒకనాటి తన అభిమానులు అడిగే అనేక ప్రశ్నలకు చాల ఓపిగ్గా సమాధానం ఇస్తున్నాడు. ఒకప్పుడు చాల ఆవేశంగా ఉండే కృష్ణవంశీ ఇప్పుడు చాల సహనంతో సమాధానాలు ఇవ్వడం చాలామందికి ఆశ్చర్యం కలిగిస్తోంది. ఈ ఛాట్ అలనాటి సినిమాల గురించి అప్పటి పరిస్థితుల గురించి ఈనాటి తరం వారికి తెలిసేలా సమాధానాలు ఇస్తున్నాడు.
ఈ క్రమంలో భాగంగా ఒక నెటిజన్ ‘రంగమార్తాండ’ సినిమా పై ప్రశంసలు కురిపిస్తూ ఈనాటి సమాజానికి అలాంటి సినిమాలు చాల అవసరం అనీ అలాంటి సినిమాలు కొంతమందిలో అయినా మార్పు తీసుకువస్తాయని అభిప్రాయపడుతూ అలాంటి సినిమాలను ఇంకా చాలతీయమని సలహా ఇచ్చాడు. దానికి కృష్ణవంశీ స్పందిస్తూ అది పెద్ద ఫ్లాప్ సార్. థియేటర్లలో ఎవ్వరూ చూడలేదు. నాకు నిర్మాతలకు పెద్ద లాస్. మళ్లీనా.. వొద్దు స్వామీ” అంటూ తనలోని నిరాశను వ్యక్తపరిచాడు.
వాస్తవానికి ఈ సినిమాకు విమర్శకుల నుండి మంచి ప్రశంసలు లభించాయి. కృష్ణవంశీలోని దర్శకుడు మళ్ళీ నిద్రలేచాడు అంటూ ‘రంగమార్తాండ’ మూవీకి మంచి రేటింగ్స్ కూడ ఇచ్చారు. అయితే ఈ సినిమాకు ఫ్యామిలీ ప్రేక్షకులు కూడ ధియేటర్లకు రాకపోవడంతో ఆమూవీ భారీ ఫ్లాప్ గా మారింది. ఈ మూవీలో నటించిన బ్రహ్మానందం రమ్యకృష్ణ తమ పాత్రలకు జీవం పోసి నటించినా జనం పట్టించుకోలేదు. మరాఠీ భాషలో విజయవంతం అయి జాతీయ అవార్డు పొందిన ఈమూవీని తెలుగులో రీమేక్ చేస్తే జనం ఎవరు పట్టించుకోలేదు. దీనితో ధైర్యం చేసి మంచి సినిమాలను తీసిన జనం చూడరు అన్న విషయం మరొకసారి రుజువు అవవడంతో నిజంగా మంచి సినిమాలు తీయాలి అని అభిలాష పడే దర్శకులు నిరుత్సాహ పడుతున్నారు..