తెలుగు సినిమా పరిశ్రమకు కొత్త నాయకత్వం: ఫిల్మ్ ఛాంబర్ అధ్యక్షుడిగా సురేష్ బాబు, ఉపాధ్యక్షుడిగా నాగవంశీ..!
తెలుగు సినిమా పరిశ్రమలో కీలక పరిణామం చోటు చేసుకుంది. తెలుగు ఫిల్మ్ ఛాంబర్ ఆఫ్ కామర్స్కు నూతన కార్యవర్గం ఏర్పడింది. ఆదివారం జరిగిన ఛాంబర్ ఎన్నికల్లో ప్రముఖ నిర్మాత సురేష్ బాబు అధ్యక్షుడిగా ఎన్నికయ్యారు. అదే విధంగా ఉపాధ్యక్షుడిగా నాగవంశీ ఎన్నికయ్యారు. ఈ ఎన్నికల్లో ప్రోగ్రెసివ్ ప్యానల్ ఘన విజయం సాధించడంతో పరిశ్రమలో కొత్త ఉత్సాహం కనిపిస్తోంది.ఆదివారం నిర్వహించిన ఎన్నికల్లో మొత్తం 48 మంది అభ్యర్థులు పోటీ చేయగా, ప్రోగ్రెసివ్ ప్యానల్ నుంచి 31 మంది ఈసీ (ఎగ్జిక్యూటివ్ కమిటీ) సభ్యులుగా విజయం సాధించారు. మరోవైపు ‘మన ప్యానల్’ నుంచి 17 మంది ఈసీ సభ్యులుగా ఎన్నికయ్యారు. పెద్ద నిర్మాతలు ప్రాతినిధ్యం వహించిన ప్రోగ్రెసివ్ ప్యానల్కు సభ్యుల నుంచి విశేష మద్దతు లభించింది. ఈ ప్యానల్కు చెందిన అభ్యర్థులందరూ అధ్యక్ష పదవికి సురేష్ బాబుకు సంపూర్ణ మద్దతు ప్రకటించారు.
ప్రోగ్రెసివ్ ప్యానల్ నుంచి పోటీ చేసిన సురేష్ బాబు కూడా ఈ ఎన్నికల్లో విజయం సాధించి, తెలుగు ఫిల్మ్ ఛాంబర్ అధ్యక్షుడిగా బాధ్యతలు స్వీకరించనున్నారు. ఎన్నికల అనంతరం ఈసీ సభ్యులు సమావేశమై ఛాంబర్ నూతన పదాధికారులను ఏకగ్రీవంగా ఎన్నుకున్నారు. అందులో భాగంగా అధ్యక్షుడిగా సురేష్ బాబు, ఉపాధ్యక్షుడిగా నాగవంశీని ఎంపిక చేశారు. ఇక కార్యదర్శిగా అశోక్ కుమార్ను, కోశాధికారిగా రామదాసును ఎన్నుకున్నారు. వీరితో పాటు మరో 12 మంది ఎగ్జిక్యూటివ్ కమిటీ సభ్యులు కూడా ఛాంబర్ కార్యవర్గంలో కొనసాగనున్నారు. ఈ నూతన కార్యవర్గం 2027 వరకు తన పదవీకాలాన్ని కొనసాగించనుంది.
తెలుగు ఫిల్మ్ ఛాంబర్ ఆఫ్ కామర్స్లో ప్రస్తుతం మొత్తం 3335 మంది సభ్యులు ఉన్నారు. అయితే వీరిలో 1421 మంది మాత్రమే ఎన్నికల్లో తమ ఓటు హక్కును వినియోగించుకున్నారు. పరిశ్రమ అభివృద్ధి, నిర్మాతల సమస్యలు, కార్మికుల సంక్షేమం, సినిమాల నిర్మాణానికి అనుకూల వాతావరణం వంటి అంశాలపై నూతన కార్యవర్గం ప్రత్యేక దృష్టి సారిస్తుందని సభ్యులు ఆశాభావం వ్యక్తం చేస్తున్నారు. కొత్త నాయకత్వంతో తెలుగు సినిమా పరిశ్రమ మరింత బలోపేతం అవుతుందని, ఐక్యతతో ముందుకు సాగుతుందని పరిశ్రమ వర్గాలు విశ్వసిస్తున్నాయి.