ఇండస్ట్రీ పెద్దలకు నేరుగా వార్నింగ్ ఇస్తున్న ఎస్కెఎన్.. వాళ్ళ రియాక్షన్ ఏంటి?
సినిమా ఇండస్ట్రీలో సంక్రాంతి పండుగ వచ్చిందంటే చాలు, థియేటర్ల కేటాయింపు విషయంలో పెద్ద యుద్ధమే నడుస్తుంది. ముఖ్యంగా నైజాం ఏరియాలో అగ్ర హీరోల చిత్రాల మధ్య థియేటర్ల పంపకం ఎప్పుడూ ఒక సవాల్గానే మారుతుంది. ఈ ఏడాది కూడా సంక్రాంతి బరిలో భారీ చిత్రాలు పోటీ పడుతుండటంతో థియేటర్ల రచ్చ ఇప్పటికే మొదలైంది. ఇలాంటి ఉత్కంఠభరిత వాతావరణంలో నిర్మాత ఎస్కేఎన్ (SKN) చేసిన వ్యాఖ్యలు ఇప్పుడు టాలీవుడ్లో హాట్ టాపిక్గా మారాయి. ప్రభాస్ నటిస్తున్న 'ది రాజాసాబ్' సినిమా గురించి ప్రస్తావిస్తూ ఆయన చేసిన కామెంట్లు ఇండస్ట్రీ వర్గాల్లో ఒకింత సంచలనం సృష్టిస్తున్నాయి.
'ది రాజాసాబ్' అనేది కేవలం ఒక ప్రాంతీయ సినిమా కాదని, ఇది ఒక భారీ పాన్ ఇండియా ప్రాజెక్ట్ అని ఎస్కేఎన్ నొక్కి చెప్పారు. ఈ సినిమా విజయానికి మరియు సరైన థియేటర్ల కేటాయింపు విషయంలో పరిశ్రమలోని పెద్దలందరూ సహకరిస్తారని తాను ఆశిస్తున్నట్లు ఆయన వెల్లడించారు. అయితే ఈ సందర్భంగా ఆయన చేసిన ఒక హెచ్చరిక లాంటి వ్యాఖ్య అందరినీ ఆశ్చర్యపరిచింది. సినిమా విడుదల కోసం సహకరించిన వారు ఎవరు, అడ్డంకులు సృష్టించిన వారు ఎవరనే విషయాలను పండగ తర్వాత ప్రెస్ మీట్ పెట్టి మరీ బహిరంగంగా చెబుతానని ఆయన స్పష్టం చేశారు. ఆ ప్రెస్ మీట్లో అందరి పేర్లు సానుకూలంగా ఉండాలని తాను కోరుకుంటున్నట్లు ఆయన పేర్కొన్నారు.
ముఖ్యంగా థియేటర్ల కొరతపై స్పందిస్తూ, తనకు ఒక్క థియేటర్ ఇస్తే ఆ కృతజ్ఞతను వంద సార్లు చెప్పుకుంటానని, అదే సమయంలో ఒక్క థియేటర్ ఇవ్వకపోయినా ఆ విషయాన్ని రెండు వందల సార్లు బయటపెడతానని ఎస్కేఎన్ చేసిన వ్యాఖ్యలు సోషల్ మీడియాలో వైరల్ అవుతున్నాయి. పెద్ద సినిమాల మధ్య థియేటర్ల పంపకంలో జరిగే రాజకీయాలను ఆయన పరోక్షంగా ఎండగట్టడమే దీని ఉద్దేశమని విశ్లేషకులు భావిస్తున్నారు. నిర్మాతగా తన సినిమా హక్కుల కోసం ఆయన ఎంత పట్టుదలతో ఉన్నారో ఈ మాటలు స్పష్టం చేస్తున్నాయి. మరి సంక్రాంతి తర్వాత ఎస్కేఎన్ నిర్వహించబోయే ఆ ప్రెస్ మీట్లో ఎవరి పేర్లు వినబడతాయో, అది టాలీవుడ్లో ఎలాంటి చర్చలకు దారితీస్తుందో వేచి చూడాలి.