సంక్రాంతి పండుగ సందర్భంగా మెగాస్టార్ చిరంజీవి హీరోగా తెరకెక్కిన తాజా చిత్రం థియేటర్లలో సందడి చేస్తూ బాక్సాఫీస్ వద్ద సూపర్ డూపర్ హిట్‌గా దూసుకుపోతున్న విషయం తెలిసిందే. ప్రేక్షకుల నుంచి భారీ స్పందన రావడంతో పాటు, అన్ని వర్గాల ప్రేక్షకులను ఆకట్టుకుంటూ ఈ సినిమా మంచి కలెక్షన్లు రాబడుతోంది. ఈ ఘన విజయం నేపథ్యంలో సినిమా యూనిట్ ప్రత్యేకంగా ప్రమోషనల్ ఇంటర్వ్యూలను ప్లాన్ చేసింది. ఈ క్రమంలో తాజాగా విడుదలైన ఒక ప్రమోషనల్ ఇంటర్వ్యూలో మెగాస్టార్ చిరంజీవి దర్శకుడు అనిల్ రావిపూడిని ఆసక్తికరమైన ప్రశ్నలతో ముంచెత్తారు. ముఖ్యంగా నయనతార ప్రమోషన్లకు సాధారణంగా దూరంగా ఉంటారని అందరికీ తెలిసిందే. అలాంటి నయనతారను ఈ సినిమాలో హీరోయిన్‌గా ఎలా ఒప్పించగలిగారు? ఆమెతో ప్రమోషన్ల గురించి ఏం మాట్లాడారు? అసలు ఇది ఎలా సాధ్యమైంది? అంటూ చిరంజీవి ప్రశ్నించారు.ఈ ప్రశ్నలకు అనిల్ రావిపూడి ఇచ్చిన సమాధానం ఇప్పుడు సోషల్ మీడియాలో వైరల్ అవుతోంది. ఆయన మాట్లాడుతూ… “చిరంజీవి గారి స్థాయికి తగ్గట్టుగా, ఆయనకు ఎదురుగా నిలబడగలిగే బలమైన, ధీటైన వ్యక్తిత్వం ఉన్న హీరోయిన్ ఎవరు అని నేను చాలా ఆలోచించాను. అప్పుడు నా మనసులో ముందుగా కనిపించింది నయనతార గారే. ఈ పాత్రకు ఆమె కాకుండా వేరే హీరోయిన్‌ని పెట్టడం అంటే కథతోనే రాజీ పడినట్లవుతుందని నాకు అనిపించింది. అలా చేస్తే సినిమా మొదటికే మోసం అయ్యే అవకాశం ఉందని కూడా నేను భావించాను” అని చెప్పారు.

అనంతరం నయనతారను ఈ సినిమాలో నటించమని కోరినప్పుడు, నిర్మాత సాహు గారపాటి అలాగే సుస్మిత కూడా కలిసి ఆమెతో మాట్లాడారని తెలిపారు. కథ మొత్తం వినిన తర్వాత నయనతార స్పందన చాలా స్పష్టంగా ఉందని అనిల్ రావిపూడి గుర్తు చేసుకున్నారు. “కథ నాకు చాలా నచ్చింది. చిరంజీవి గారితో సినిమా చేయాలనే కోరిక ఎప్పటినుంచో ఉంది. అందులో వెంకటేష్ గారు కూడా ఉన్నారు. కానీ కొన్ని టెక్నికల్ విషయాలు కుదరడం లేదు. ఇప్పుడు ఏం చేద్దాం? ఒకవేళ నేను ఈ సినిమా చేయను అని చెబితే నువ్వేం చేస్తావు?” అని నయనతార నన్ను అడిగారని ఆయన తెలిపారు.అప్పుడు తాను ఇచ్చిన సమాధానమే పరిస్థితిని పూర్తిగా మార్చేసిందని అనిల్ రావిపూడి చెప్పారు. “మీరు వెంకటేష్ గారి ‘దృశ్యం’ సినిమా చూశారు కదా. అందులో కథలో జరిగే విధంగా, ఈరోజు నేను నయనతార గారికి ఫోన్ చేయలేదు, ఆమెకు కథ చెప్పలేదు అని భావించుకుని ప్రశాంతంగా పడుకుంటాను” అని తాను చెప్పానని వెల్లడించారు.

ఈ సమాధానం విన్న వెంటనే నయనతార కొద్దిసేపు నవ్వారని, ఆ తర్వాతే అసలు నిర్ణయం చెప్పారని ఆయన తెలిపారు. “మనం ఈ సినిమా చేస్తున్నాం. ఆ టెక్నికల్ ఇష్యూస్ ఎలా క్లియర్ చేసుకుంటావో చేసుకో” అని ఆమె గ్రీన్ సిగ్నల్ ఇచ్చారని చెప్పారు. కథ నచ్చడం, పాత్రపై నమ్మకం కలగడం వల్లే నయనతార ఈ సినిమా చేయడానికి అంగీకరించారని స్పష్టం చేశారు.అంతేకాదు, ప్రమోషన్ల విషయంలో కూడా నయనతార సహకారం ఎంతో కీలకమైందని అనిల్ రావిపూడి పేర్కొన్నారు. తాను చెప్పిన విధానం, సినిమాపై ఉన్న నమ్మకం, పాత్ర ప్రాధాన్యం నచ్చడంతోనే ఆమె ప్రమోషన్లకు ముందుకు వచ్చారని తెలిపారు. ఇది తనకు ఎంతో ప్రత్యేకమైన అనుభవమని, ఒక దర్శకుడిగా చాలా సంతోషంగా అనిపించిందని ఆయన చెప్పారు.

ఈ ఇంటర్వ్యూ ప్రస్తుతం అభిమానుల్లో విపరీతమైన ఆసక్తిని రేకెత్తిస్తోంది. మెగాస్టార్ చిరంజీవి ప్రశ్నలు, అనిల్ రావిపూడి సమాధానాలు సినిమాపై అంచనాలను మరింత పెంచాయి. మొత్తంగా ఈ సినిమా విజయం వెనుక ఉన్న కథలు ఒక్కొక్కటిగా బయటకు వస్తుండటంతో ప్రేక్షకుల్లో ఉత్సాహం మరింత పెరుగుతోంది.