టాలీవుడ్ గ్లోబల్ స్టార్, మ్యాన్ ఆఫ్ మాసెస్ జూనియర్ ఎన్టీఆర్ పుట్టినరోజు కానుకగా అభిమానులకు మైండ్ బ్లోయింగ్ సర్ప్రైజ్ ఇచ్చింది చిత్రబృందం. కన్నడ సంచలనం, ‘కేజీఎఫ్’, ‘సలార్’ చిత్రాల దర్శకుడు ప్రశాంత్ నీల్ – ఎన్టీఆర్ కాంబినేషన్‌లో రాబోతున్న భారీ పాన్-ఇండియా చిత్రం టైటిల్‌ను అధికారికంగా ప్రకటిస్తూ పవర్‌ఫుల్ గ్లింప్స్‌ను విడుదల చేశారు. ఈ చిత్రానికి 'డ్రాగన్' (DRAGON) అనే వైవిధ్యమైన టైటిల్‌ను ఖరారు చేశారు.

ఈ గ్లింప్స్ చూస్తుంటే థియేటర్లలో రక్తం ఏరులై పారడం ఖాయంగా కనిపిస్తోంది. సరికొత్త విజువల్స్, నరాలు తెగే ఉత్కంఠను రేకెత్తించే డైలాగ్స్‌తో ప్రశాంత్ నీల్ తనదైన మార్క్ యాక్షన్ ప్రపంచాన్ని ఆవిష్కరించారు.

కలల్లోకి కూడా రావొద్దు... ఎన్టీఆర్ ఊచకోత డైలాగ్!
గ్లింప్స్ చివర్లో ఎన్టీఆర్ చెప్పిన డైలాగ్ థియేటర్లలో పూనకాలు తెప్పించడం ఖాయం. "దేవుడు నాకొక గొప్ప వరం ఇచ్చాడు... ట్రిగ్గర్‌ నొక్కగానే మరిచిపోవడం. నిదరపోయినప్పుడు నా కల్లోకి నేను చంపినవాళ్ల ముఖాలు రావు, మిగిలివున్న శత్రువుల ముఖాలే కనపడతాయి. పొరపాటున కూడా నా కల్లోకి రావొద్దు...." అంటూ ఎన్టీఆర్ ‘డ్రాగన్’ అవతారంలో శత్రువుల గుండెల్లో వణుకు పుట్టించారు. తనను ఎదిరిస్తే మరణం ఎలా ఉంటుందో ముందే హెచ్చరిస్తూ సరికొత్త రౌద్ర రూపాన్ని చూపించారు.

ఆసక్తి రేకెత్తిస్తున్న కథా నేపథ్యం (Opium Poppy):
ఈ సినిమా కథా నేపథ్యం ఎంత భారీగా ఉండబోతుందో ఈ గ్లింప్స్ ద్వారా దర్శకుడు స్పష్టం చేశారు. "బ్రిటిష్ వాళ్లు భారతదేశానికి కాటన్, స్టీల్, స్పైసెస్ కోసం వచ్చారు. కానీ 250 ఏళ్లు వాళ్లు ఇక్కడే ఉండిపోవడానికి కారణం... ఒక మొక్క. ప్రపంచంలోనే అత్యంత వ్యసనకారక పదార్థమైన హెరాయిన్‌ని తయారు చేసే ఆ మొక్క... ఓపియమ్ పాపి (Opium Poppy)" అంటూ సాగిన వాయిస్ ఓవర్ సినిమాపై అంచనాలను అమాంతం పెంచేసింది. ఈ ప్రమాదకరమైన మొక్క హెరాయిన్ కంటే ఎక్కువ మంది కరడుగట్టిన విలన్లను తయారు చేసిందని, ఇది ముమ్మాటికీ విలన్ల కథే అని టీజర్ హింట్ ఇస్తోంది. అలాంటి విలన్ల సామ్రాజ్యాన్ని శాసించే మహా శక్తిగా ఎన్టీఆర్ 'డ్రాగన్' పాత్రలో కనిపించబోతున్నారు.

ప్రశాంత్ నీల్ మార్క్ విజువల్స్ & రవి బస్రూర్ సంగీతం:
దర్శకుడు ప్రశాంత్ నీల్ ఎంచుకున్న డార్క్ థీమ్ విజువల్స్, ప్రత్యేకమైన కలర్ గ్రేడింగ్ ఈ గ్లింప్స్‌కు ప్రధాన ఆకర్షణగా నిలిచాయి. దీనికి తోడు ప్రశాంత్ నీల్ ఆస్థాన సంగీత దర్శకుడు రవి బస్రూర్ అందించిన బ్యాక్‌గ్రౌండ్ స్కోర్ (BGM) గూస్‌బంప్స్ తెప్పించేలా ఉంది. ప్రతి ఫ్రేమ్‌లోనూ వైలెన్స్, ఎమోషన్ పీక్స్‌లో కనిపించాయి.

రిలీజ్ డేట్ ఫిక్స్!
భారీ నిర్మాణ విలువలతో మైత్రీ మూవీ మేకర్స్, నందమూరి తారక రామారావు ఆర్ట్స్, టీ సిరీస్ ఫిల్మ్స్ సంస్థలు సంయుక్తంగా ఈ చిత్రాన్ని నిర్మిస్తున్నాయి. నందమూరి కల్యాణ్ రామ్, నవీన్ యెర్నేని, రవిశంకర్ యలమంచిలి, కొసరాజు హరికృష్ణ ఈ చిత్రానికి నిర్మాతలుగా వ్యవహరిస్తున్నారు.

ప్రపంచవ్యాప్తంగా భారీ అంచనాలు ఉన్న ఈ యాక్షన్ ఎంటర్టైనర్ వచ్చే ఏడాది జూన్ 11న ప్రపంచవ్యాప్తంగా థియేటర్లలో గ్రాండ్‌గా విడుదల కానుంది. 'డ్రాగన్' విధ్వంసం ఎలా ఉంటుందో చూడాలంటే వచ్చే ఏడాది వేసవి వరకు ఓపిక పట్టాల్సిందే!