‘లవ్ & వార్’ ఫస్ట్ లుక్లో రణ్బీర్ కపూర్ - అదిరిపోయే కొత్త అవతార్
భారతీయ సినీ పరిశ్రమలో అత్యంత ప్రతిష్టాత్మక దర్శకుడిగా పేరుగాంచిన సంజయ్ లీలా భన్సాలీ తెరకెక్కిస్తున్న సరికొత్త దృశ్యకావ్యం ‘లవ్ & వార్’. ఈ సినిమా ప్రకటన వెలువడిన నాటి నుంచే చిత్రసీమలోనూ, ప్రేక్షకుల్లోనూ ఊహించని స్థాయిలో అంచనాలు నెలకొన్నాయి. బాలీవుడ్ అగ్ర నటీనటులైన రణ్బీర్ కపూర్, అలియా భట్, విక్కీ కౌశల్ తొలిసారిగా ఈ క్రేజీ ప్రాజెక్ట్లో కలిసి నటిస్తుండటంతో ఈ సినిమాపై బాక్స్ ఆఫీస్ వద్ద భారీ క్రేజ్ నెలకొంది.
తాజాగా ఈ మూవీ నుంచి మేకర్స్ రణ్బీర్ కపూర్ కి సంబంధించిన ఫస్ట్ లుక్ పోస్టర్ను అధికారికంగా విడుదల చేశారు. ఈ పోస్టర్లో రణ్బీర్ మునుపెన్నడూ లేని విధంగా అత్యంత తీవ్రమైన, సరికొత్త అవతార్లో కనిపిస్తూ అభిమానులను విశేషంగా ఆకట్టుకుంటున్నారు. భన్సాలీ మార్క్ గ్రాండ్ విజువల్స్, అద్భుతమైన ఫ్రేమింగ్, రిచ్ ప్రొడక్షన్ వాల్యూస్ ఈ పోస్టర్లో స్పష్టంగా ప్రతిబింబిస్తున్నాయి. పోస్టర్తో పాటు అందించిన నేపథ్య సంగీతం (BGM) విజువల్స్కు మరింత డెప్త్ ఇస్తూ, భన్సాలీ మ్యూజికల్ విజన్ను మరోసారి చాటిచెప్పింది.
ఈ క్రేజీ ఫస్ట్ లుక్ను సోషల్ మీడియాలో పంచుకుంటూ మేకర్స్ “వోహ్ రుత్బా, వోహ్ రౌబ్, వోహ్ జునూన్!” అనే పవర్ ఫుల్ క్యాప్షన్ జోడించారు. ఈ వ్యాఖ్యలు సినిమాలో రణ్బీర్ పాత్ర యొక్క గాంభీర్యాన్ని, తీవ్రతను సూచిస్తూ ఆసక్తిని మరింత పెంచాయి. ఈ గ్రాండ్ పీరియాడిక్ డ్రామాను 2027 జనవరి 21న ప్రపంచవ్యాప్తంగా గ్రాండ్గా విడుదల చేయడానికి మేకర్స్ ముహూర్తం ఖరారు చేశారు.
రణ్బీర్ కపూర్, అలియా భట్, విక్కీ కౌశల్ ప్రధాన పాత్రల్లో రూపుదిద్దుకుంటున్న ఈ భారీ చిత్రాన్ని హిందీతో పాటు తెలుగు, తమిళ భాషల్లోనూ పాన్-ఇండియా స్థాయిలో ఒకేసారి విడుదల చేయనున్నారు. ఈ ఫస్ట్ లుక్ విడుదలతో సినిమాపై ఉన్న అంచనాలు ఒక్కసారిగా ఆకాశాన్ని తాకాయి. ఈ సినిమా బాక్సాఫీస్ వద్ద ఏ స్థాయిలో రికార్డులు క్రియేట్ చేస్తుందో చూడాల్సి ఉంది.