విడుదలైన ఎన్టీఆర్ ఫస్ట్ లుక్ !
నందమూరి తారకరామారావు వర్థంతి సందర్భంగా బాలకృష్ణ నిర్మిస్తున్న ఎన్టీఆర్ బయోపిక్ టీజర్ ఉంటుంది అని ఆశించారు అంతా. దీనికోసం రామకృష్ణ స్టూడియోలో కొద్ది రోజులు షూట్ కూడా చేసారు. ఈ షూట్ లో బాలయ్య కూడా పాల్గొన్నాడు.
ఎన్టీఆర్ చైతన్య రథం మీద ఉన్న సీన్లు ఈ టీజర్ లో ఉంటాయని ప్రచారం కూడా జరిగింది. అయితే ఈ టీజర్ బయటకు రాకుండా ఈ మూవీ ఫస్ట్ లుక్ బయటకు వచ్చింది. దీనికి కారణం ఈ టీజర్ కు సంబంధించిన టెక్నికల్ వర్క్ ఇంకా పూర్తి కాలేదు అని కొందరు అంటూ ఉంటే బాలయ్యకు ఈ టీజర్ ను విడుదల చేసే మంచిరోజు మంచి ముహూర్తం ఇంకా కుదరలేదు అని మరికొందరు అంటున్నారు.
ఈరోజు ఎన్టీఆర్ వర్ధంతి సందర్భంగా ఈ ఫస్ట్ లుక్ ను మాత్రమే విడుదల చేసారు. ‘సమాజమే దేవాలయం ప్రజలే దేవుళ్ళు’ అని చెప్పే ఎన్టీఆర్ తనజీవితం అంతా ప్రజల మధ్యనే గడిపారు. ఆయన చనిపోయి 22 సంవత్సరాలు దాటిపోయినా తెలుగువారి హృదయాలలో ఎప్పుడు ఆయన చిరస్థాయిగా నిలిచిపోతాడు.
తేజ దర్శకత్వం వహిస్తున్న ఈ బయోపిక్ లో నందమూరి తారకరామారావు జీవితానికి సంబంధించిన అన్ని విషయాలు చూపెడతాము అని చెపుతున్నప్పటికీ ఆయన జీవితం చివరి దశలో జరిగిన రాజకీయ వెన్నుపోటు సంఘటనలను చూపించే సాహసం బాలకృష్ణ చేయగలడా అన్న సందేహాలు కలుగుతున్నాయి. ఎన్టీఆర్ జీవితం పై బాలకృష్ణ బయోపిక్ తీసినా తీయకపోయినా తెలుగుప్రజలు మాత్రం ఆయనను ఎప్పటికీ మరిచిపోయే అవకాశం లేదు..