ಅರವಿಂದ್ ಕೇಜ್ರಿವಾಲ್ ಪ್ರಮಾಣ ವಚನ ಸ್ವೀಕಾರದಲ್ಲಿ ಬೇಬಿ ಮಫ್ಲರ್ ಮನ್ ಭರಾಟೆ
ನವ ದೆಹಲಿ: ರಾಷ್ಟ್ರ ರಾಜಕೀಯದಲ್ಲಿ ಭಾರೀ ಕುತೂಹಲ ಮೂಡಿಸಿದ್ದ ದೆಹಲಿ ವಿಧಾನಸಭಾ ಚುನಾವಣೆಯಲ್ಲಿ ಆಪ್ ಗೆದ್ದು ಇದೀಗ ಅರವಿಂದ್ ಕೇಜ್ರಿವಾಲ್ ಪ್ರಮಾಣ ವಚನ ಸ್ವೀಕಾರ ಸಮಾರಂಭದಲ್ಲೂ ಕಾಣಿಸಿಕೊಂಡ ‘ಬೇಬಿ ಮಫ್ಲರ್ ಮನ್’ ಭರಾಟೆ ಬಲು ಜೋರಿತ್ತು. ಹೌದು, ಯಾರು ಈ ಬೇಬಿ ಮಫ್ಲರ್ ಮನ್ ಗೊತ್ತಾ! ಇಲ್ಲಿದೆ ನೋಡಿ ಮಾಹಿತಿ.
ನವದೆಹಲಿ ವಿಧಾನಸಭಾ ಚುನಾವಣೆಯ ಫಲಿತಾಂಶದ ದಿನ ಅರವಿಂದ್ ಕೇಜ್ರಿವಾಲ್ ಅವರಂತೆಯೇ ವೇಷ ಧರಿಸಿದ್ದ ಪುಟ್ಟ ಮಗುವಿನ ಫೋಟೋ ಕೂಡ ಸಿಕ್ಕಾಪಟೆ ವೈರಲ್ ಆಗಿತ್ತು. ಅರವಿಂದ್ ಕೇಜ್ರಿವಾಲ್ ರಂತೆ ತಲೆಗೆ ಕಪ್ಪು ಮಫ್ಲರ್ ಕಟ್ಟಿಕೊಂಡು, ಆಪ್ ಟೊಪ್ಪಿ ಹಾಕಿಕೊಂಡು, ಕೇಜ್ರಿವಾಲ್ ಧರಿಸುವ ತರಹದ್ದೇ ಕನ್ನಡಕ ಹಾಕಿಕೊಂಡು, ಸಾಲದ್ದಕ್ಕೆ ಮೀಸೆಯನ್ನೂ ಬಳಿದುಕೊಂಡು ದೆಹಲಿಯ ಆಪ್ ಕಚೇರಿ ಎದುರು ಅಂದು ಸಂಭ್ರಮಾಚರಣೆಯ ಹೊತ್ತಲ್ಲಿ ಪಾಲ್ಗೊಂಡಿದ್ದ ಪುಟ್ಟ ಬಾಲಕ ಇಂಟರ್ ನೆಟ್ ನಲ್ಲಿ ಸೆನ್ಸೇಶನ್ ಸೃಷ್ಟಿಸಿದ್ದ.
ಇದೇ ಮಫ್ಲರ್ ಬೇಬಿ, ಚೋಟಾ ಕೇಜ್ರಿವಾಲ್ ಇಂದು ಕೂಡ ದೆಹಲಿಯ ರಾಮಲೀಲಾ ಮೈದಾನದಲ್ಲಿ ಅರವಿಂದ್ ಕೇಜ್ರಿವಾಲ್ ಅವರ ಪ್ರಮಾಣವಚನ ಸ್ವೀಕಾರ ಸಮಾರಂಭದಲ್ಲಿ ಕಾಣಿಸಿಕೊಂಡಿದ್ದಾನೆ. ಆದರೆ ವಿಶೇಷವೆಂದರೆ ಆತ ಸುಮ್ಮನೆ ಬಂದಿಲ್ಲ. ಹೌದು, ಮುಖ್ಯಮಂತ್ರಿ ಪ್ರಮಾಣವಚನ ಅಂದರೆ ಸುಮ್ಮನೇನ.
ಚುನಾವಣಾ ಫಲಿತಾಂಶದ ದಿನ ಈ ಬಾಲಕನ ವೇಷಕ್ಕೆ ಜನ ಭಲೇ ಎಂದಿದ್ದರು. ಒಂದೇ ದಿನದಲ್ಲಿ ಇವನ ಪ್ರಸಿದ್ಧಿಯನ್ನು ಗುರುತಿಸಿದ ಆಮ್ ಆದ್ಮಿ ಪಕ್ಷ, ಅರವಿಂದ್ ಕೇಜ್ರಿವಾಲ್ ಮತ್ತು ಸಚಿವರ ಪ್ರಮಾಣ ವಚನ ಸ್ವೀಕಾರ ಸಮಾರಂಭಕ್ಕೆ ಬಾಲಕನಿಗೆ ಅಧಿಕೃತ ಆಹ್ವಾನ ನೀಡಿತ್ತು. ನಿನ್ನೆ ಕೂಡ ಅರವಿಂದ್ ಕೇಜ್ರಿವಾಲ್ ಅವರ ವೇಷದಲ್ಲಿಯೇ ಈತ ಬಂದಿದ್ದ. ಪುಟ್ಟ ಪುಟ್ಟ ಹೆಜ್ಜೆ ಹಾಕುತ್ತ ವೇದಿಕೆ ಸುತ್ತಮುತ್ತ ಓಡಾಡಿದ್ದಾನೆ. ಕೆಲವರು ಇವನೊಟ್ಟಿಗೆ ಸೆಲ್ಫೀ, ಫೋಟೋಗಳನ್ನು ತೆಗೆದುಕೊಂಡಿದ್ದಾರೆ. ಲಿಟ್ಲ್ ಮಫ್ಲರ್ ಮನ್, ಬೇಬಿ ಅರವಿಂದ್ ಕೇಜ್ರಿವಾಲ್ ಎಂದು ಆತನನ್ನು ಕರೆಯುತ್ತಿದ್ದಾರೆ.
ಆಪ್ ಸಂಸದ ರಾಘವ್ ಚಾಧಾ ಕೂಡ ಪುಟ್ಟ ಹುಡುಗನೊಂದಿಗೆ ಫೋಟೋ ತೆಗೆದುಕೊಂಡು ಟ್ವಿಟರ್ ನಲ್ಲಿ ಪೋಸ್ಟ್ ಮಾಡಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಿ ಫುಲ್ ವೈರಲ್ ಆಗಿವೆ ಪೋಟೋಸ್