తెలంగాణ బడ్జెట్: విద్యార్థినులకు బంపర్ ఆఫర్... పూర్తి వివరాలివే?
ఇటు ఏపిలో అటు తెలంగాణలో రాష్ట్ర అసెంబ్లీ బడ్జెట్ల ఖాతా మొదలయ్యింది. ఏ రంగానికి ఎంత నిధులు కేటాయిస్తున్నారు అన్న మాట పక్కన పెడితే ఈ సమావేశాలకు ప్రత్యర్ధుల స్పందనలు ఎలా ఉంటున్నాయి అన్న చర్చలు జోరుగా వినపడుతున్నాయి. ఇప్పటికే ఏపిలో బడ్జెట్ అంశంపై ప్రత్యర్ధి పార్టీలు భగ్గుమంటూ వాక్ ఔట్ చేసిన అంశం పాలిటిక్స్ లో వైరల్ గా మారగా ఇపుడు తెలంగాణ రాష్ట్ర అసెంబ్లీ బడ్జెట్ చర్చనీయాంశంగా మారింది. రానున్న ఆర్థిక సంవత్సరమునకు గాను తెలంగాణ బడ్జెట్ ను ఆర్ధిక మంత్రి హరీష్ రావ్ శాసనసభలో ప్రవేశపెట్టారు.
ఈ సందర్భంగా జూబ్లీహిల్స్ వెంకటేశ్వరస్వామి ఆలయంలో అంతా సవ్యంగా జరిగి రాష్ట్రం పచ్చగా ఉండాలని ఆయన పూజలు కూడా చేశారు. ఈ క్రమంలో మీడియాతో మాట్లాడిన ఆయన ఇచ్చిన హామీలను దృష్టిలో పెట్టుకొని, రాష్ట్ర అభివృద్ధిని ధ్యేయంగా చేసుకుని, ప్రజలకు ఆమోదయోగ్యంగా ఉండేలా బడ్జెట్ ను తీర్చిదిద్దామని అన్నారు. ఇక ఆయన రాష్ట్ర బడ్జెట్ బాధ్యతలు చేపట్టడం ఇది మూడోసారి కావడం విశేషం. ఇదిలా ఉండగా ఈ సారి గవర్నర్ ప్రసంగం లేకుండానే సమావేశాలను మొదలెట్టేయడంతో కాస్త వార్తల్లో నిలుస్తోంది. అందులోనూ ప్రత్యర్ధి పార్టీలు తమతమ పాయింట్లతో ప్రభుత్వాన్ని ప్రశ్నించేందుకు ఫుల్ హాట్ గా ఉన్నట్లు పరిస్థితులు కనిపిస్తున్నాయి.
అటు కేసీఆర్ సర్కార్ సైతం అందుకు దీటుగా విశ్లేషణ ఇచ్చి నిర్ణయాలను అమలు చేసేందుకు సిద్ధంగా ఉన్నట్లు సమాచారం. బడ్జెట్ కేటాయింపులు అంశంపై ప్రభుత్వానికి , విపక్షాలకు మద్య పెద్ద సంఘర్షణే జరిగేలా ఉంది అంటూ రాజకీయ విశ్లేషకులు చెబుతున్నారు.
కాగా విద్యార్థినులకు బడ్జెట్ లో ప్రాధాన్యత కలిగించి శుభవార్త చెప్పారు. ఇందులో ప్రభుత్వ స్కూల్స్, కాలేజీ లలో చదువుతున్న 7 వ తరగతి నుండి ఇంటర్మీడియట్ వరకు అమ్మాయిలకు ఉచితంగా హైజెనిక్ కిట్స్ అందించడానికి తెలంగాణ ప్రభుత్వం పూనుకుంది. అంతే కాకుండా రక్తహీనత సమస్య ఉన్న వారికి ప్రత్యేకంగా కేసీఆర్ న్యూట్రిషన్ కిట్ ను ఇవ్వనున్నారు. దీని ద్వారా 7 లక్షల మంది అమ్మాయిలు ఉపయోగించుకోనున్నారు.