683 സ്ഥാനാർഥികൾ; ജനവിധി തേടുന്നവരിൽ ചംപയ് സോറനും!
683 സ്ഥാനാർഥികൾ; ജനവിധി തേടുന്നവരിൽ ചംപയ് സോറനും! നിയമസഭാ തെരഞ്ഞെടുപ്പിൻ്റെ ഒന്നാം ഘട്ടത്തിൽ 15 ജില്ലകളിലെ 43 മണ്ഡലങ്ങളാണ് വിധിയെഴുതുക. ഇതിൽ 17 ജനറൽ സീറ്റുകളും 20 എസ്ടി സീറ്റുകളും ആറ് എസ്‍സി സീറ്റുകളും ഉൾപ്പെടുന്നു. 73 വനിതകൾ ഉൾപ്പെടെ 683 സ്ഥാനാർഥികളാണ് മത്സരരംഗത്ത് ഉള്ളത്. 15,344 പോളിങ് ബൂത്തുകളിലായി രാവിലെ ഏഴു മണിക്ക് ആരംഭിക്കുന്ന വോട്ടെടുപ്പ് വൈകിട്ട് അഞ്ചിന് അവസാനിക്കും. 28 ദിവസം നീണ്ട വാശിയേറിയ പ്രചാരണത്തിനൊടുവിൽ ജാർഖണ്ഡ് ബുധനാഴ്ച പോളിങ് ബൂത്തിലേക്ക്. ഭരണത്തിലുള്ള ജെഎംഎം, കോൺഗ്രസ്, രാഷ്ട്രീയ ജനതാദൾ (ആ‍ർജെഡി) എന്നീ കക്ഷികളുടെ ഇന്ത്യ സഖ്യവും പ്രതിപക്ഷമായ ബിജെപിയും തമ്മിലാണ് നേർക്കുനേർ പോരാട്ടം. മുഖ്യമന്ത്രി ഹേമന്ത് സോറനും ജെഎംഎമ്മിനും നിർണായകമാണ് ഇത്തവണത്തെ തെരഞ്ഞെടുപ്പ്.
കള്ളപ്പണക്കേസിൽ എൻഫോഴ്സ്മെൻ്റ് ഡയറക്ടറേറ്റിൻ്റെ അറസ്റ്റ് നേരിട്ട ഹേമന്ത് സോറൻ അഞ്ച് മാസങ്ങൾക്കിപ്പുറമാണ് ജയിൽമോചിതനായത്. 2019ൽ ബിജെപിയിൽനിന്ന് പിടിച്ചെടുത്ത ഭരണം നിലനിർത്തനായാൽ സോറന് തൻ്റെ സ്വാധീനം ശക്തമാക്കാനാകും. മുതിർന്ന നേതാക്കൾ ആരോപണവിധേയരായ അഴിമതിക്കേസുകൾ ജെഎംഎമ്മിന് തലവേദനയാണ്. അതേസമയം രാജ്യത്ത് പ്രതിപക്ഷം ഭരിക്കുന്ന സംസ്ഥാനങ്ങളിൽ ഒന്നായ ജാർഖണ്ഡ് നിലനിർത്തുക ഇന്ത്യ സഖ്യത്തിനും അനിവാര്യമാണ്. ജാർഖണ്ഡ് മുക്തി മോർച്ച (ജെഎംഎം) വിട്ട് ബിജെപിയിലെത്തിയ മുൻ മുഖ്യമന്ത്രി ചംപയ് സോറൻ, കോൺഗ്രസ് നേതാവും ആരോഗ്യമന്ത്രിയുമായ ബണ്ണ ഗുപ്ത, ജെഎംഎം രാജ്യസഭാ എംപി മഹുവ മാജി, ബിജെപി നേതാവും മുൻ മുഖ്യമന്ത്രിയുമായ മധു കോഡയുടെ ഭാര്യ ഗീത ഖോഡ, ബിജെപി നേതാവും മുൻ മുഖ്യമന്ത്രിയുമായ രഘുബർ ദാസിൻ്റെ മരുമകൾ പൂർണിമ ദാസ് തുടങ്ങിയവരാണ് ഒന്നാം ഘട്ടത്തിൽ ജനവിധി തേടുന്ന പ്രമുഖർ.
അഞ്ച് വർഷം ഭരണം നഷ്ടമായതോടെ ഗോത്ര വിഭാഗങ്ങൾ അടക്കം പാ‍ർട്ടിയോട് അകന്നത് ബിജെപിക്ക് വെല്ലുവിളിയാണ്. ഇക്കഴിഞ്ഞ ലോക്സഭാ തെരഞ്ഞെടുപ്പിൽ സംസ്ഥാനത്ത് ബിജെപി സഖ്യത്തിൻ്റെ സീറ്റ് നില 12ൽനിന്ന് ഒൻപതായി കുറഞ്ഞിരുന്നു. ആകെയുള്ള 14 ലോക്സഭാ സീറ്റുകളിൽ രണ്ടിടത്ത് ജെഎംഎമ്മിനും ഒരിടത്ത് കോൺഗ്രസിനും വിജയിക്കാനായി. ഇക്കുറി 68 നിയമസഭാ സീറ്റുകളിലാണ് ബിജെപി സ്ഥാനാർഥികൾ മത്സരരംഗത്തുള്ളത്. മുൻ മുഖ്യമന്ത്രി ബാബുലാൽ മറാണ്ടി ധൻവാ‍ർ സീറ്റിൽ നിന്നാണ് മത്സരിക്കുന്നത്. ചംപയ് സോറൻ സെരായ്കലയിൽ നിന്നാണ് ജനവിധി തേടുന്ന്. മൊത്തം 41 സീറ്റുകളിലാണ് ജെഎംഎം മത്സരിക്കുന്നത്. ബർഹൈത് സീറ്റിൽ നിന്നാണ് ഇക്കുറിയും ഹേമന്ത് സോറൻ ജനവിധി തേടുന്നത്. ഭാര്യ കൽപന സോറൻ ഗാണ്ടെയിൽ നിന്നും സഹോദരൻ ബസന്ത് സോറൻ ദുംകയിൽ നിന്നുമാണ് മത്സരിക്കുന്നത്.
കോൺഗ്രസ് 30 സീറ്റുകളിലും ആ‍ർജെഡി ആറ് സീറ്റുകളിലുമാണ് മത്സരരംഗത്തുള്ളത്. 2019ലെ നിയമസഭാ തെരഞ്ഞെടുപ്പിൽ 81ൽ 30 സീറ്റുകളിലാണ് ജെഎംഎമ്മിന് വിജയിക്കാനായത്. ബിജെപിക്ക് 25 ഉം, കോൺഗ്രസിന് 16 ഉം സീറ്റുകളാണ് ലഭിച്ചത്. തുട‍ർന്ന് ജെംഎംഎം, കോൺഗ്രസ്, ആ‍ർജെഡി കക്ഷികൾ ചേർന്ന് സർക്കാർ രൂപീകരിക്കുകയായിരുന്നു. അതേസമയം നവംബർ 20ന് നടക്കുന്ന രണ്ടാം ഘട്ട വോട്ടെടുപ്പിൽ 38 മണ്ഡലങ്ങൾ പോളിങ് ബൂത്തിലെത്തും. 23നാണ് വോട്ടെണ്ണൽ. ജാർഖണ്ഡിൻ്റെ ചരിത്രത്തിൽ ഒരു പാർട്ടിക്കും ഒറ്റയ്ക്ക് കേവല ഭൂരിപക്ഷം കടക്കാനായിട്ടില്ലെന്നത് ശ്രദ്ധേയമാണ്. സംസ്ഥാന ജനസംഖ്യയുടെ 27 ശതമാനം വരുന്ന ഗോത്ര വിഭാഗത്തിൻ്റെ വോട്ടുകളാണ് എല്ലാ പാ‍ർട്ടികളുടെയും ലക്ഷ്യം.