മുനമ്പം ഭൂമി തർക്കം; സുപ്രധാന നാല് തീരുമാനങ്ങളുമായി സംസ്ഥാന സർക്കാർ!
മുനമ്പം ഭൂമി തർക്കം; സുപ്രധാന നാല് തീരുമാനങ്ങളുമായി സംസ്ഥാന സർക്കാർ! ഹൈക്കോടതി മുൻ ആക്ടിങ് ചീഫ് ജസ്റ്റിസായിരുന്ന സിഎൻ രാമചന്ദ്രൻ നായരുടെ നേതൃത്വത്തിലാണ് കമ്മീഷൻ. മൂന്നു മാസത്തിനുള്ളിൽ കമ്മിഷൻ നടപടികൾ പൂർത്തീകരിക്കണമെന്നാണ് സർക്കാർ കാണുന്നതെന്ന് നിയമ വ്യവസായ മന്ത്രി പി രാജീവ് വാർത്താസമ്പേളനത്തിൽ പറഞ്ഞു. റവന്യു മന്ത്രി കെ രാജൻ, വഖഫ് മന്ത്രി വി അബ്ദുറഹിമാൻ എന്നിവർ സന്നിഹിതരായിരുന്നു. മുനമ്പത്തെ വഖഫ് ഭൂമി പ്രശ്നത്തിൽ പരിഹാരം കാണാനായി ജുഡീഷ്യൽ കമ്മീഷനെ നിയമിക്കാൻ തീരുമാനമായി. മുഖ്യമന്ത്രിയുടെ അധ്യക്ഷതയിൽ ചേർന്ന ഉന്നതതല യോഗത്തിലാണ് തീരുമാനം. ആരെയും കുടിയൊഴിപ്പിക്കാതെ തന്നെ പ്രശ്നത്തിന് ശാശ്വത പരിഹാരം കാണുക എന്ന ലക്ഷ്യത്തോടെയാണ് ജുഡീഷ്യൽ കമ്മിഷനെ നിയമിക്കാൻ സർക്കാർ തീരുമാനിച്ചത്.
ഭൂമിയിൽ കൈവശാവകാശം ഉള്ള ആരെയും ഒഴിപ്പിക്കില്ലെന്ന് മന്ത്രി പി രാജീവ് അറിയിച്ചു.ജുഡീഷ്യൽ കമ്മീഷനെ നിയോഗിക്കാനുള്ള സംസ്ഥാന സർക്കാർ തീരുമാനത്തിൽ നിരാശയെന്ന് മുനമ്പം സമരസമിതി പ്രതികരിച്ചു. ഭൂമിയുടെ ഉടമസ്ഥത പരിശോധിച്ചാണ് രജിസ്റ്റർ ചെയ്തത്. വീണ്ടുമൊരു ജുഡീഷ്യൽ അന്വേഷണം എന്നു പറയുമ്പോൾ ആലോചിക്കേണ്ടിവരും. തങ്ങളുടെ റവന്യു അവകാശങ്ങൾ നിഷേധിക്കപ്പെടാൻ തുടങ്ങിയിട്ട് മൂന്ന് വർഷമായെന്നും സമരസമിതി കൂട്ടിച്ചേർത്തു. അതേസമയം റിലേ നിരാഹാര സമരം തുടരാനാണ് സമരസമിതിയുടെ തീരുമാനം. സമരസമിതി പ്രവർത്തകർ മുനമ്പത്ത് പന്തം കൊളുത്തി പ്രതിഷേധം നടത്തി. സംസ്ഥാന സർക്കാരിൻ്റെ നാല് തീരുമാനങ്ങൾ
മുനമ്പത്ത് താമസിക്കുന്നവരെ ഒഴിപ്പിക്കാൻ പാടില്ല, അവരുടെ നിയമപരമായ അവകാശം സംരക്ഷിക്കും.
മുനമ്പത്ത് താമസിക്കുന്നവരെ ഒഴിപ്പിക്കാൻ പാടില്ല, അവരുടെ നിയമപരമായ അവകാശം സംരക്ഷിക്കും.
ഇനിയൊരു തീരുമാനമാകുംവരെ വഖഫ് ബോർഡ് നോട്ടീസുകൾ പുറപ്പെടുവിക്കരുതെന്നും നടപടികൾ സ്വീകരിക്കരുതെന്നും യോഗം നിർദേശിച്ചു.
മുനമ്പത്തുകാരുടെ നിയമപരമായ അവകാശങ്ങൾ എങ്ങനെ സംരക്ഷിക്കാൻ കഴിയുമെന്ന് പരിശോധിക്കാൻ ഹൈക്കോടതി മുൻ ആക്ടിങ് ചീഫ് ജസ്റ്റിസ് സിഎൻ രാമചന്ദ്രൻ നായർ അധ്യക്ഷനായ ജുഡീഷ്യൽ കമ്മീഷനെ നിയോഗിക്കും. മൂന്നു മാസത്തിനുള്ളിൽ കമ്മീഷൻ നടപടികൾ പൂർത്തിയാക്കും.
നികുതി അടയ്ക്കാനുള്ള തീരുമാനം സ്റ്റേ ചെയ്ത കോടതി നടപടിക്കെതിരെ തുടർനടപടികൾ സർക്കാർ കോടതിയിൽ സ്വീകരിക്കും.
അവിടെ താമസിക്കുന്നവരുടെ നിയമപരമായ അവകാശം സർക്കാർ സംരക്ഷിക്കും. ഇനിയൊരു തീരുമാനം ഉണ്ടാകുന്നതുവരെ വഖഫ് ബോർഡ് നടപടികൾ സ്വീകരിക്കരുതെന്ന് സർക്കാർ നിർദേശിച്ചിട്ടുണ്ടെന്നും അവർ അത് അംഗീകരിച്ചതായും മന്ത്രി പറഞ്ഞു. വഖഫ് ബോർഡ് പുതിയ നോട്ടിസ് നൽകില്ലെന്നും നൽകിയ നോട്ടിസുകളിൽ തുടർനടപടിയുണ്ടാകില്ലെന്നും സമരം പിൻവലിക്കണമെന്നും സർക്കാർ അഭ്യർഥിച്ചു. കമ്മീഷൻ നടപടികൾക്ക് ആവശ്യമായ എല്ലാ സംവിധാനങ്ങളും സർക്കാർ ഒരുക്കുമെന്നും മന്ത്രിമാർ പറഞ്ഞു.