యనమల గవర్నర్ కలకి బ్రేక్! బీజేపీ లెక్కలు వేరే..!
తెలంగాణా, ఆంధ్ర రాజకీయాల్లో ఇప్పుడు రాజ్ భవన్ పేరు వినిపించగానే ఒక్కసారిగా ఎన్టీఆర్ హయాం గుర్తొస్తుంది. ఎందుకంటే గవర్నర్ పదవి అనేది రాజకీయ జీవితంలో చివరి శ్వాస గౌరవంతో తళుక్కుమనే ఓ క్రౌన్గా భావిస్తారు. అటువంటి అత్యున్నత రాజ్యాంగ పదవి టీడీపీ సీనియర్ నేత అశోక్ గజపతిరాజుకి గోవా గవర్నర్గా లభించగా, అదే ఆశతో ఎదురు చూసిన మరో సీనియర్ నేత యనమల రామకృష్ణుడికి మాత్రం నిరాశే ఎదురైంది. 43 ఏళ్ల రాజకీయ అనుభవం.. కానీ ఒక్క పదవి దక్కలేదా? .. తునికి చెందిన యనమల రామకృష్ణుడు ఎన్టీఆర్ దగ్గర నుంచే రాజకీయ జీవితాన్ని ప్రారంభించి, చంద్రబాబు నాయుడితో పార్టీ వృద్ధికి అంకితమై పనిచేశారు. స్పీకర్గా, ఆర్థిక మంత్రిగా, పీఏసీ చైర్మన్గా ఎన్నో కీలక బాధ్యతలు నిర్వహించిన యనమలకు గవర్నర్ పోస్టు దక్కుతుందని చాలామంది ఊహించారు. కానీ ఆ అవకాశం విజయనగరం కోట వైపు వెళ్లడంతో ఆయన వర్గంలో అసంతృప్తి చోటుచేసుకుంది.
“నాకు తక్కువేంటీ?” అంటూ యనమల ఆవేదన..! వయసు ఏడున్నర పదులకు దగ్గరగా ఉన్న యనమల, ఇటీవలే ఎమ్మెల్సీ పదవికి గుడ్బై చెప్పారు. ఇంత సుదీర్ఘమైన సేవలకు గుర్తింపు లభించకపోవడాన్ని ఆయన తట్టుకోలేకపోతున్నారు. “పార్టీకి క్లిష్ట కాలాల్లో అండగా నిలిచా.. రాజకీయాలకు న్యాయం చేశా.. గవర్నర్ పదవిలో ఇంకోసారి ప్రజలకు సేవ చేసేందుకు సిద్ధంగా ఉన్నా” అన్న భావనలు ఆయన హృదయంలో ఇంకా మిగిలే ఉన్నాయి. కేంద్ర బీజేపీ లెక్కలు వేరే! .. ఏపీకి ఇప్పటికే గవర్నర్ పదవి ఇచ్చిన నేపథ్యంలో ఇంకో అవకాశం రావడం కష్టమేనన్నదే బీజేపీ వర్గాల్లో చర్చ. మళ్లీ ఆ అవకాశం వస్తే కేఈ కృష్ణమూర్తికి ఇస్తారన్న ప్రచారం యనమల వర్గానికి మరింత కంటిమీద కునుకు లేకుండా చేస్తోంది. బీజేపీ పెద్దల నిర్ణయాల్లో టీడీపీ పాత్ర మితమైనదే అన్న మాట వినిపిస్తోంది.
"పార్టీ ఇచ్చింది తక్కువేం కాదు" అన్న టాక్ కూడా ఉంది .. విపక్షంలోనూ, అధికారంలోనూ యనమలకు పదవులు దక్కాయి. కుమార్తె ఎమ్మెల్యే, అల్లుడు ఎంపీ, వియ్యంకుడు కూడా ఎమ్మెల్యే. దాంతో పార్టీ ఇప్పటికే అతిధి సత్కారం చేసిందన్న వాదన కూడా వస్తోంది. అందుకే రాజ్ భవన్కి ఇక దూరమే అన్న భావన పార్టీ నేతల్లో బలపడుతోంది. గౌరవ విరమణ కల నెరవేరదా? .. ఇప్పుడే గవర్నర్ పదవి రాకపోయినా.. యనమల లాంటి సీనియర్ నేతలకు గౌరవమైన స్థానం ఇవ్వాలని కొన్ని వర్గాలు కోరుకుంటున్నాయి. కానీ రాజకీయాల్లో చివరి నిర్ణయం మాత్రం కాలానికే చెందుతుంది. “వైట్ అంబాసడర్”లో వచ్చిన యనమల.. “రాజ్ భవన్”లో మాత్రం స్టాప్ కావాలనుకున్నా.. ఆ గేట్ ఇప్పట్లో ఓపెన్ కావడం కనిపించడం లేదు.