వైసీపీలో అంతర్గత పరిణామాలపై ప్రస్తుతం ఆసక్తికర చర్చ సాగుతోంది. నిన్నటి దాకా పార్టీ వైఫల్యాలకు సజ్జల రామకృష్ణారెడ్డి కారణమని అంతా భావించినా, అసలు సమస్య జగన్మోహన్ రెడ్డి ధోరణిలోనే ఉందని సొంత పార్టీ నేతలు బహిరంగంగానే వ్యాఖ్యానిస్తున్నారు. సజ్జల వ్యవహారశైలి నచ్చక కొందరు రెడ్డి సామాజికవర్గ నాయకులు పార్టీ వీడిన మాట వాస్తవమే అయినా, ఆయనను వెనకేసుకొస్తున్న అధినేత నిర్ణయాలే ఇప్పుడు ప్రశ్నార్థకమయ్యాయి. నాయకుల వినతులు పట్టించుకోకుండా, క్షేత్రస్థాయిలో ప్రజల నాడి తెలుసుకోకుండా జగన్ తీసుకుంటున్న మొండి నిర్ణయాలు పార్టీని ఇబ్బందుల్లోకి నెడుతున్నాయి. కరడుగట్టిన కార్యకర్తలు సైతం అధినేత వైఖరితో విభేదించడం పార్టీ పతనానికి సంకేతంగా కనిపిస్తోంది.


వచ్చే ఎన్నికల్లో పాత ఓటు బ్యాంకు అండగా ఉంటుందని జగన్ ధీమాగా ఉన్నా.. వాస్తవ పరిస్థితులు అందుకు భిన్నంగా ఉన్నాయి. ఇటీవల వెలువడిన ప‌లు స‌ర్వేల ఆధారంగా వైసీపీ గ్రాఫ్ భారీగా పడిపోయిందని స్పష్టం చేస్తున్నాయి. ముఖ్యంగా గుంటూరు, ప్రకాశం, విజయవాడ ప్రాంతాల్లో వ్యతిరేకత తీవ్రస్థాయిలో ఉంది. గతంలో పాదయాత్ర ప్రభావంతో 2019లో ఈ జిల్లాల్లో పార్టీకి ఆదరణ లభించినా, ఇప్పుడు ఆ పరిస్థితి మాయమైంది. ప్రజలు తిరిగి తెలుగుదేశం, జనసేన వైపు మొగ్గు చూపుతున్నారు. జిల్లాల వారీగా పార్టీ పట్టు కోల్పోతుండటం నాయకులను ఆందోళనకు గురి చేస్తోంది. ఈ పరిస్థితికి కేవలం సలహాదారుల మీద సాకు చూపడం సరికాదని, అధినేత తన వైఖరి మార్చుకోకపోవడమే ప్రధాన అడ్డంకి అని విశ్లేషకులు భావిస్తున్నారు.


అమరావతి రాజధాని అంశంపై జగన్ చేసిన వ్యాఖ్యలు కోస్తా ప్రాంత ప్రజల్లో తీవ్ర ఆగ్రహాన్ని కట్టలు తెంచుకునేలా చేశాయి. రాజధానిని మార్చడం వల్ల కలిగే నష్టం కంటే, ఆ ప్రాంత రైతులను, ప్రజలను కించపరిచేలా మాట్లాడటం పార్టీకి పెద్ద మైనస్ అయ్యింది. దీనికి తోడు రాజకీయాల్లో హుందాతనం పాటించకుండా రప్పా రప్పా వంటి కౌంటర్ డైలాగులను ప్రోత్సహించడం కొన్ని వ‌ర్గాల‌ను దూరం చేసింది. హింసను ప్రేరేపించేలా పొట్టేళ్ల రక్తంతో ఫ్లెక్సీలకు అభిషేకం చేసిన వారిని ఇంటికి పిలిచి సత్కరించడం వంటి చర్యలు సమాజంలో ప్రతికూల సంకేతాలు పంపాయి. ఇలాంటి వివాదాస్పద నిర్ణయాలే జగన్ వ్యక్తిగత ఇమేజ్‌ను దెబ్బతీయడమే కాకుండా పార్టీని పాతాళానికి తొక్కేలా చేస్తున్నాయి.


ప్రస్తుత సంక్షోభం నుంచి గట్టెక్కాలంటే సజ్జల వంటి సలహాదారులను పక్కన పెట్టడం ఒక్కటే పరిష్కారం కాదు. జగన్ తన పంథా మార్చుకుని, ప్రజల ఆకాంక్షలకు అనుగుణంగా నడుచుకోవాలని రాజకీయ వర్గాలు సూచిస్తున్నాయి. క్షేత్రస్థాయిలో పనిచేసే నాయకులకు ప్రాధాన్యత ఇవ్వకుండా, కేవలం కోటరీ మాటలే వింటూ వెళితే భవిష్యత్తులో వైకాపా మనుగడ కష్టమేనన్న వాదన బలంగా వినిపిస్తోంది. ఓటు బ్యాంకు పెరుగుతుందని భ్రమల్లో ఉన్న అధినేతకు, వాస్తవంలో తగ్గుతున్న ఆదరణను గమనించాలని సొంత పార్టీ నేతలే కోరుతున్నారు. ఇప్పటికైనా జగన్ తన శైలిని సమీక్షించుకోకపోతే, వచ్చే ఎన్నికల్లో పార్టీ ఊహించని దెబ్బ తినడం ఖాయంగా కనిపిస్తోంది.