రేపే వైకుంఠ ఏకాదశి..ఎట్టి పరిస్థితుల్లోనూ ఈ తప్పులు అస్సలు చేయకూడదు..!
హిందూ సాంప్రదాయంలో ఏకాదశి తిథికి ప్రత్యేకమైన ప్రాముఖ్యత ఉంది. ఇతర తిథులతో పోలిస్తే ఏకాదశిని అత్యంత పవిత్రమైనదిగా భావించి భక్తిశ్రద్ధలతో పాటిస్తారు. ప్రతి నెలలో ఒకసారి ఏకాదశి తిథి వస్తూనే ఉంటుంది. అయితే ఏడాది మొత్తం వచ్చే ఏకాదశులలో పుష్య మాసంలో వచ్చే ముక్కోటి ఏకాదశి అత్యంత శ్రేష్ఠమైనదిగా పరిగణించబడుతుంది. ఈ పవిత్రమైన ఏకాదశినే వైకుంఠ ఏకాదశి అని కూడా అంటారు. ఈ రోజున భక్తులు శ్రీమహావిష్ణువును ఆరాధించి, ఉపవాస దీక్షను ఆచరిస్తే సకల పాపాలు తొలగిపోయి మోక్షప్రాప్తి కలుగుతుందని విశ్వసిస్తారు. ముఖ్యంగా వైకుంఠ ఏకాదశి రోజున ఆలయాలలో ఉత్తర ద్వార దర్శనం అత్యంత విశిష్టమైనదిగా భావిస్తారు. ఉత్తర ద్వారం ద్వారా స్వామివారిని దర్శించుకోవడం వల్ల వైకుంఠ లోక ప్రవేశానికి మార్గం సుగమమవుతుందని పురాణాల్లో పేర్కొనబడింది.
భక్తి, నియమ నిష్ఠలతో ఈ రోజున విష్ణు పూజ చేయడం వల్ల పుణ్యం లభిస్తుందని పెద్దలు చెబుతారు. అయితే కొందరు తెలియక లేదా అజ్ఞానవశాత్తూ ఈ పవిత్రమైన రోజున కొన్ని తప్పులు చేస్తుంటారు. ఈ తప్పుల వల్ల పుణ్యం దూరమవడమే కాకుండా దరిద్రం కూడా కలగవచ్చని పండితులు హెచ్చరిస్తున్నారు. అందుకే వైకుంఠ ఏకాదశి రోజున తప్పనిసరిగా చేయకూడని విషయాల గురించి తెలుసుకోవడం చాలా అవసరం.
వైకుంఠ ఏకాదశి రోజున చేయకూడని తప్పులు :
*వైకుంఠ ఏకాదశి రోజున మనసు, మాట, క్రియ — మూడు కూడా శుద్ధిగా ఉండాలి. పూర్తి భక్తితో, ఏకాగ్రతతో శ్రీమహావిష్ణువును స్మరించాలి. ఇతర లోకిక ఆలోచనలు, కోపతాపాలు, అసూయ వంటి భావాలకు ఈ రోజున పూర్తిగా దూరంగా ఉండాలి.
*కొంతమంది ఈ రోజున ఉపవాసం పాటించకుండా సాధారణంగా అన్నం భుజిస్తుంటారు. కానీ పండితుల ప్రకారం, వైకుంఠ ఏకాదశి నాడు పూర్తిగా అన్నం తినకూడదు. సాధ్యమైనంతవరకు ఉపవాసం లేదా ఫలాహారం మాత్రమే తీసుకోవాలి. శారీరక ఇబ్బందులు ఉన్నవారు కూడా తేలికపాటి ఆహారంతో నియమాలను పాటించాలి.
*ఈ రోజున ఉల్లి, వెల్లుల్లి, మాంసాహారం పూర్తిగా వర్జించాలి. ఇవి తామస గుణాన్ని పెంచుతాయని, ఆధ్యాత్మిక సాధనకు ఆటంకం కలిగిస్తాయని శాస్త్రాలు చెబుతున్నాయి.
*అలాగే ఇతరులపై కోపం చూపించడం, అనవసరమైన వాదనలు చేయడం, అబద్ధాలు చెప్పడం వంటి వాటికి పూర్తిగా దూరంగా ఉండాలి. ఎవరి పట్లా ఈర్ష్య, ద్వేష భావాలు పెట్టుకోకూడదు. ప్రతి విషయంలో సానుకూలంగా ఆలోచిస్తూ, శాంతంగా వ్యవహరించాలి.
*వైకుంఠ ఏకాదశి రోజున జుట్టు కత్తిరించుకోవడం, గోళ్లు కత్తిరించుకోవడం చేయకూడదు. ఇవి అశుభకరంగా భావిస్తారు. శరీర శుభ్రత కోసం ముందురోజే స్నానం చేసి సిద్ధమవ్వడం మంచిది.
వైకుంఠ ఏకాదశి వెనుక ఉన్న పురాణ కథ
ప్రతి సంవత్సరం సూర్యుడు దక్షిణాయనం నుండి ఉత్తరాయనంలోకి ప్రవేశిస్తాడు. ఆ మార్పు జరిగే ముందు వచ్చే ఏకాదశినే వైకుంఠ ఏకాదశిగా పిలుస్తారు. పుష్య మాసంలో వచ్చే ఈ తొలి ఏకాదశి ఎంతో పవిత్రమైనదిగా పురాణాలు పేర్కొంటాయి.పురాణాల ప్రకారం, ఈ రోజున శ్రీమహావిష్ణువు గరుడ వాహనంపై ముక్కోటి దేవతలతో కలిసి వైకుంఠం నుండి భూలోకానికి అవతరించాడని విశ్వాసం. అందుకే దీనిని ముక్కోటి ఏకాదశి అని కూడా అంటారు. ఈ రోజున వైకుంఠ ద్వారాలు తెరుచుకుంటాయని, స్వర్గానికి వెళ్లే మార్గం ఈ రోజునే సులభమవుతుందని భక్తుల నమ్మకం.
గమనిక : ఈ సమాచారం కేవలం అవగాహన మరియు ప్రాథమిక సమాచార కోసమే ఇవ్వబడింది. ఇందులో పేర్కొన్న విషయాలు సంప్రదాయ విశ్వాసాలు, పురాణ కథనాలు మరియు సాధారణ సమాచారం ఆధారంగా ఉన్నాయి. పూర్తి వివరాలు మరియు వ్యక్తిగత ఆచరణకు సంబంధించి పండితులు లేదా అర్చకులను సంప్రదించడం ఉత్తమం అని పాఠకులు గుర్తుంచుకోవాలి..!