ఐపీఎల్ 2025 సీజన్ వేడెక్కిపోయింది. మొన్న మంగళవారం కోల్‌కతా నైట్ రైడర్స్, ఢిల్లీ క్యాపిటల్స్‌పై 14 పరుగుల తేడాతో థ్రిల్లింగ్ విక్టరీ కొట్టడంతో.. ప్లేఆఫ్స్ ఎవరు చేరతారనే లెక్కలు మరింత రసవత్తరంగా, ఉత్కంఠగా మారిపోయాయి. మరి ఏ టీమ్ పరిస్థితి ఏంటి? టాప్-4కి చేరాలంటే ఏం చేయాలో ఓ లుక్కేద్దాం.

1. RCB (రాయల్ ఛాలెంజర్స్ బెంగళూరు)

బెంగళూరు టీమ్ పాయింట్ల పట్టికలో టాప్‌లో ఉంది. 10 మ్యాచ్‌లు ఆడి 7 గెలిచి, 14 పాయింట్లతో జోరు మీదున్నారు. మిగిలిన 4 మ్యాచ్‌లలో కేవలం 2 గెలిస్తే చాలు.. ఈజీగా ప్లేఆఫ్స్‌కి క్వాలిఫై అయిపోతారు. ఫ్యాన్స్‌కి పండగే.

2. ముంబై ఇండియన్స్

ముంబై ఇండియన్స్ 10 గేమ్స్‌లో 12 పాయింట్లతో రెండో స్థానంలో నిలిచింది. ఇప్పటివరకు 6 మ్యాచ్‌లు గెలిచారు, అందులోనూ వరుసగా ఐదు విజయాలతో దూసుకుపోతున్నారు. వాళ్లు ఆడబోయే 4 మ్యాచ్‌లలో 3 గెలిస్తే.. టాప్-4 బెర్త్ దాదాపు ఖాయం చేసుకుంటారు.

3. గుజరాత్ టైటాన్స్

గుజరాత్ టైటాన్స్ కేవలం 9 మ్యాచ్‌లలోనే 12 పాయింట్లు సాధించి మంచి పొజిషన్‌లో ఉంది. 6 గెలిచారు, ఇంకా 5 మ్యాచ్‌లు మిగిలున్నాయి. మరో 2 గెలిచినా రేసులో ఉంటారు. అదే 3 మ్యాచ్‌లు గెలిస్తే ప్లేఆఫ్స్ బెర్త్ దాదాపు గ్యారెంటీ.

4. ఢిల్లీ క్యాపిటల్స్

ఢిల్లీ క్యాపిటల్స్ 10 గేమ్స్‌లో 6 గెలిచినా.. గత 6 మ్యాచ్‌లలో 4 ఓడిపోయారు. అయినా నాలుగో స్థానంలోనే ఉన్నారు. ఇంకా 4 మ్యాచ్‌లు మిగిలి ఉన్నాయి. ప్లేఆఫ్ రేసులో నిలవాలంటే కనీసం 2 గెలవాలి. లేదంటే కష్టమే.

5. పంజాబ్ కింగ్స్

పంజాబ్ కింగ్స్ 9 మ్యాచ్‌లలో 11 పాయింట్లతో ఉంది (వర్షం వల్ల రద్దయిన మ్యాచ్‌తో కలిపి). వాళ్ళు ప్లేఆఫ్స్ చేరాలంటే మిగిలిన 5 మ్యాచ్‌లలో కనీసం 3 గెలవాలి. ఒకవేళ 2 మాత్రమే గెలిస్తే.. వాళ్ల అవకాశాలు మిగతా జట్ల ఫలితాలపై ఆధారపడి ఉంటాయి.

6. లక్నో సూపర్ జెయింట్స్

లక్నో టీమ్ 10 మ్యాచ్‌లలో 5 గెలిచింది. వాళ్ల దారి కొంచెం కష్టమే అయినా, అసాధ్యం కాదు. మిగిలిన 4 మ్యాచ్‌లలో 3 గెలిస్తే ప్లేఆఫ్ ఆశలు ఇంకా సజీవంగా ఉంటాయి. ట్రై చేయాల్సిందే.

7. కోల్‌కతా నైట్ రైడర్స్

KKR పరిస్థితి కొంచెం కష్టంగా ఉంది. 10 మ్యాచ్‌లలో కేవలం 4 మాత్రమే గెలిచారు. ప్లేఆఫ్స్‌పై ఏదైనా ఆశ ఉండాలంటే.. మిగిలిన 4 మ్యాచ్‌లలో కనీసం 3 గెలవాల్సిందే. ఇది డూ ఆర్ డై సిట్యువేషన్.

8. రాజస్థాన్ రాయల్స్

రాజస్థాన్ రాయల్స్ ప్లేఆఫ్స్ చేరాలంటే.. మిగిలిన 4 మ్యాచ్‌లూ గెలవాలి. అప్పుడు వాళ్ల పాయింట్లు 14 అవుతాయి. అయినా సరే, ప్లేఆఫ్స్‌కు చేరాలంటే మిగతా జట్ల ఫలితాలు కూడా వాళ్లకు అనుకూలంగా రావాలి. అద్భుతం జరిగితే తప్ప కష్టం.

9. సన్‌రైజర్స్ హైదరాబాద్

హైదరాబాద్ ఈ సీజన్‌లో చాలా ఇబ్బంది పడింది. వాళ్లు టాప్-4 మీద ఏమాత్రం ఆశలు పెట్టుకోవాలన్నా.. మిగిలిన 5 మ్యాచ్‌లూ తప్పక గెలవాలి. వేరే ఆప్షనే లేదు.

10. చెన్నై సూపర్ కింగ్స్

చెన్నై సూపర్ కింగ్స్ పరిస్థితి మరీ దారుణం. 9 మ్యాచ్‌లలో కేవలం 2 మాత్రమే గెలిచారు. మిగిలిన 5 మ్యాచ్‌లు గెలిచినా కూడా క్వాలిఫై అవ్వడం దాదాపు అసాధ్యం. ఏదైనా అద్భుతం జరిగితే తప్ప వాళ్లకు అవకాశం లేదు. ఫ్యాన్స్ నిరాశలో ఉన్నారు.