ఐపీఎల్ 19: మినీ వేలం హాట్ టాపిక్: ఫ్రాంచైజీల దృష్టి అంతా ఈ ప్లేయర్పైనే!
ఇండియన్ ప్రీమియర్ లీగ్ (ఐపీఎల్) అంటే కేవలం క్రికెట్ మాత్రమే కాదు, కోట్ల రూపాయల వ్యాపారం, వేల మంది యువ ఆటగాళ్ల కలల ప్రపంచం! ఈసారి డిసెంబర్ 16న అబుదాబి వేదికగా జరగనున్న మినీ వేలం.. మెగా యుద్ధానికి సిద్ధమవుతోంది. ఇది మినీ వేలం అయినప్పటికీ, దీనికి రికార్డు స్థాయిలో స్పందన లభించింది. ఏకంగా 14 దేశాల నుంచి 1,355 మంది ఆటగాళ్లు తమ పేర్లను నమోదు చేసుకున్నారు! అయితే, ఈ ఆటగాళ్లందరికీ దక్కే అవకాశాలు ఎంత? పది ఫ్రాంచైజీలలో కలిపి ఖాళీగా ఉన్న స్థానాలు కేవలం 77 మాత్రమే! అంటే, 1355 మంది యువ, సీనియర్ క్రికెటర్లు కేవలం 77 గోల్డెన్ టికెట్ల కోసం తమ అదృష్టాన్ని పరీక్షించుకోనున్నారు. ఈ గణాంకాలే వేలంలో ఎంతటి హోరాహోరీ పోరు ఉంటుందో చెప్పకనే చెబుతున్నాయి. ఒక్క రోజులోనే ఎంతోమంది తలరాతలు మారనున్నాయి!
కోట్ల వర్షం ఎవరిపై?
ఫ్రాంచైజీల వద్ద మొత్తం ₹237.55 కోట్ల ధనం అందుబాటులో ఉంది. ఇందులో కోల్కతా నైట్ రైడర్స్ (KKR) వద్ద అత్యధికంగా ₹64.30 కోట్లు ఉన్నాయి. వారికి ఏకంగా 13 స్లాట్లు ఖాళీగా ఉండటంతో, వేలంలో భారీగా ఖర్చు చేసే అవకాశం ఉంది. మరోవైపు, ధోనీ సారథ్యంలోని చెన్నై సూపర్ కింగ్స్ (CSK) కూడా ₹43.40 కోట్లతో బలమైన అభ్యర్థుల కోసం వేట మొదలుపెట్టనుంది. ఇక మన సన్రైజర్స్ హైదరాబాద్ (SRH) పర్స్లో ₹25.50 కోట్లు ఉండగా, 10 స్లాట్లను భర్తీ చేయాల్సి ఉంది.ఈసారి వేలంలో అంతర్జాతీయ స్టార్ల జాతర కనిపిస్తోంది. కామెరూన్ గ్రీన్, స్టీవ్ స్మిత్, రచిన్ రవీంద్ర, వానిందు హసరంగా, మతీశ పతిరాణా వంటి ప్రపంచ స్థాయి ఆటగాళ్లు రిజిస్టర్ చేసుకున్నారు. ₹2 కోట్ల అత్యధిక బేస్ ధర కేటగిరీలో దాదాపు 47 మంది విదేశీ స్టార్లు ఉన్నారు.
భారత యువతకు అగ్నిపరీక్ష!
విదేశీ ఆటగాళ్లు పెద్ద మొత్తంలో బేస్ ప్రైస్లో ఉన్నప్పటికీ, భారత ఆటగాళ్ల నుంచి రవి బిష్ణోయ్, వెంకటేష్ అయ్యర్ మాత్రమే ₹2 కోట్ల బేస్ ధరలో ఉండటం గమనార్హం. మయాంక్ అగర్వాల్, పృథ్వీ షా, దీపక్ హుడా వంటి దేశీయ ప్రముఖులు కూడా వేలంలోకి వచ్చారు. అన్ని ఫ్రాంచైజీలు ఖచ్చితంగా సరైన దేశీయ టాలెంట్ను తక్కువ ధరకు కొనుగోలు చేయడానికి పదునైన వ్యూహాలను అమలు చేస్తాయి. యువ భారత ఆటగాళ్లకు ఇది ఒక అగ్నిపరీక్ష వంటిది.మొత్తం 77 మందికి మాత్రమే అవకాశం ఉన్న ఈ ఉత్కంఠభరితమైన పోరులో.. ఏ స్టార్ ఆటగాడిపై కోట్ల వర్షం కురుస్తుంది? ఏ యువ ఆటగాడి అదృష్టం మారిపోతుంది? డిసెంబర్ 16న అబుదాబిలో జరగబోయే ఈ మినీ వేలంతోనే, వచ్చే ఐపీఎల్ సీజన్ విజేత ఎవరనే దానికి తొలి సంకేతాలు దొరుకుతాయి!