ఒక బిడ్డకు తల్లి - తండ్రి ఇద్దరు ఉంటారు - కానీ 'దయారా' కనబోయే బిడ్డకు తల్లి - తండ్రి రెండు ఆయనే! సారీ ఆమెనే!
కొన్ని జంతువుల్లో "బై సెక్సువల్ అనిమల్స్" ఉంటాయి. అంటే ద్విలింగ జంతువు లన్న మాట. “స్త్రీ పురుష పునరుత్పత్తి అవయవాలు” రెండు ఒకే జంతువులో ఉండి, దానిలో, దానితోనే- పునరుత్పత్తి జరిగి "బిడ్డ" కు జన్మనివ్వటం జరుగుతుంది అన్నమాట. సాధారణంగా ఈ లైంగిక నిర్మాణం “ఇన్వర్టిబ్రేట్స్” అంటే వెన్నుముక లేని జంతువులలో ఉంటుంది. ఉదాహరణకు: జలగలు, వానపాములు, ఇలాంటివి. కానీ మానవ జాతిలో ఇలా జరగాలని తానె తన బిడ్డకు తల్లి తండ్రి అవ్వాలని కోరుకుంటున్నారు ఒకరు. ఆ ఆలోచన వింతగా ఉన్నా ఇదొక అద్భుతం.
సృష్టిలో ఏ బిడ్డకైనా తల్లి, తండ్రి ఇద్దరూ విడివిడిగా ఉంటారు. కానీ, ఒకరు మాత్రం తల్లి, తండ్రి రెండూ తానే అయి ఒక బిడ్డకు జన్మనివ్వ నున్నారు. అంటే తన వీర్యంతో- తన నుండి ఉత్పత్తైన అండంతో - ఫలదీకరణ తనలోనే జరిగి, తనలోనే పిండంగా ఎదిగి, తనకే బిడ్డ పుట్టాలనేది విచిత్రమే. తనే బిడ్డకు జన్మనిచ్చి తల్లి తండ్రి కావాలని ప్రయత్నిస్తోంది. నూతన సాంకేతికతతో అది సాధ్యమనే తేలుతుంది, నిజం కాబోతుంది ఆ ఆలోచన.
పూర్తి వివరాల్లోకి వెళ్తే, గుజరాత్ పంచమహల్ జిల్లాలోని గోద్రా అనే గ్రామంలో నివసించే “డాక్టర్ జెస్నూర్ దయారా” పుట్టుక తో మగవాడిగా జన్మించాడు. అయితే, వయసు పెరుగుతున్నకొద్దీ శరీరంలో స్త్రీ లక్షణాలు కూడా పెరుగుతుండటం తో తానో “ట్రాన్స్ జెండర్” అనే విషయం తెలుసుకున్నాడు. దీంతో సంపూర్ణ స్త్రీగా మారిపోవాలని నిర్ణయించుకున్నాడు. స్త్రీగా మారిన తర్వాత తాను తల్లిని కూడా కావాలని నిర్ణయించు కున్నాడు.
ఇందులో భాగంగా తానే మగాడిలా ఉన్న ప్రస్తుత సమయంలోనే తన వీర్యాన్ని భద్రపర్చుకున్నాడు. భవిష్యత్తులో దీన్ని ఉపయోగించి తను బిడ్డకు జన్మనివ్వాలని భావిస్తున్నాడు. ఈ ప్రక్రియ ద్వారా జన్మించే బిడ్డకు డాక్టర్ జెస్నూర్ దయారా తల్లి, తండ్రి అవుతారు.
ఈ నిర్ణయంపై దయారా ఇలా చెప్పారు. ఆయన మాటలలోనే : ‘‘చిన్నప్పటి నుంచి నాకు ఆడవారిగా జీవించాలని ఉండేది. మా అమ్మ, సోదరి లాగా చీర కట్టుకోవాలని ఉండేది. లిప్ స్టిక్ వేసుకోవాలని ఆరాటపడేవాణ్ణి. కానీ చుట్టూ ఉన్న సమాజానికి భయపడి, నా లోని స్త్రీని బయటకు రానివ్వలేదు. ఆ సందర్భంలో ఎంబీబీఎస్ చదవడానికి నేను రష్యా వెళ్లాను. అక్కడ నాలాగే ఉన్న చాలా మందిని చూశాను. వారు తమకు ఇష్ట ప్రకారం స్వేచ్ఛగా జీవించేవారు. వారిని చూసి నా లోని భయాన్ని తొలగించు కొని, నాకు నచ్చిన విధంగా బతకడం మొదలు పెట్టాను. నాలో ఈ మార్పును చూసి మొదట్లో నా తల్లిదండ్రులు ఇబ్బంది పడ్డారు. కానీ క్రమంగా వారు నన్ను అర్థం చేసుకున్నారు. నా చుట్టూ ఉన్న సమాజం కూడా నన్ను అంగీకరించడం ప్రారంభించింది”
కాగా, త్వరలోనే శస్త్ర చికిత్స ద్వారా పూర్తి స్థాయిలో స్త్రీగా మారనుంది దయారా. అందరు స్త్రీల లాగే తాను కూడా స్వయంగా మాతృత్వపు అనుభూతిని పొందాలని అనుకుంటుంది. అందుకే శస్త్ర చికిత్సకు ముందే తన వీర్యాన్ని భద్రపర్చాలని భావించింది. ఇందుకు గాను అహ్మదాబాద్ ఆనంద్ లోని సంతానోత్పత్తి కేంద్రాన్ని సందర్శించి తన నిర్ణయం చెప్పింది. వారుకూడా తన నిర్ణయాన్ని గౌరవించి వీర్యాన్ని భద్రపరిచేందకు అంగీకరించారు.
శస్త్రచికిత్స ద్వారా పూర్తిగా స్త్రీగా మారిన తర్వాత ఈ వీర్యాన్ని ఉపయోగించి తాను బిడ్డను కనాలని భావిస్తోంది. ఒకవేళ ఇదే జరిగితే ఒక బిడ్డకు తల్లి, తండ్రి రెండూ తానే అయిన ఏకైక వ్యక్తిగా దయారా రికార్డు సృష్టించ నుంది.
పుట్టుకతో తను ఒక “ట్రాన్స్ జెండర్ పురుషుడు” కాబట్టి ఈ దశలో తన నుంచి తాను వీర్యం సేకరించుకుని దానిని నిల్వ జేసుకొని - ఆపై స్త్రీగా మారటానికి తగిన సర్జరీ చేయించుకొని - స్త్రీ గా మారిన తదుపరి ఆ దశలో - ఈ వీర్యంతో మాతృత్వాన్ని పొంది బిడ్డకు జన్మనిచ్చితల్లిగా జన్మధన్యం చేసుకొని "మై గాడ్!" ఊహకే అందని ఆలోచన - నిజంగా ఈ భూమిపై - బిడ్డకు తల్లి, తండ్రి తానే అవుతుందన్న మాట. వినడానికి ఆశ్చర్యకరంగా ఉంది కదా! ఇది అతి త్వరలోనే నిజం కాబోతుంది.